اسلام آباد۔6مئی(اے پی پی)صدر مملکت آصف علی زرداری نال ایران دے وزیر خارجہ سید عباس عراقچی ملین اتے ݙو طرفہ تعلقات سودھا باہمی دلچسپی دے مختلف امور اتے علاقائی صورتحال تے الایا۔ ملاقات اچ علاقائی سلامتی خاص کر پہلگام واقعے دے بعد بھارت اتے پاکستان وچال جاری کشیدگی تے گالھ مہاڑ کیتی ڳئی۔ ایوان صدر دے پریس ونگ دے مطابق ملاقات اچ صدر مملکت آصف علی زارداری آکھیا جو پاکستان اتے ایران دے تاریخی اتے برادرانہ تعلقات ہن۔ صدر مملکت خطے اچ امن اتے خوشحالی ودھاوݨ سانگے رَل مِل تے کم کرݨ دی اہمیت ودھائی۔ ایرانی وزیر خارجہ آکھیا جو سپریم لیڈر آیت اللہ سید علی خامنہ ای اتے ایرانی صدر مسعود پیزشکیان دی ہدایت تے پاکستان دا دورہ کیتے، اساں موجودہ صورتحال تے پاکستان دا موقف سمجھد سڳدے ہیں۔ ایرانی وزیر خارجہ کشیدگی گھٹ کرݨ سانگے فریقین تے کوں صبر کرݨ دی صلاح ݙیندے آکھیے جو ایران پاکستان نال تعلقات کوں وݙی اہمیت ݙیندے، ایران پاکستان نال باہمی مفاد اچ ݙو طرفہ تعلقات ٻئے تکڑے بݨاوݨ چاہندے۔ ایرانی وزیر خارجہ ݙو طرفہ تجارت کوں ایندی ودھ توں ودھ صلاحیت تئیں ودھاوݨ دی لوڑھ تے وی زور ݙتے۔ ایں ملاقات اچ افغانستان دی صورتحال تے وی گالھ مہاڑ تھئی۔ ایرانی وزیر خارجہ خطے دے معاملیاں تے پاکستان نال رَل کم کرݨ دا یقین ݙیوایا۔ صدر مملکت ایں اہم موڑ تے پاکستان آوݨ تے ایرانی وزیر خارجہ دا شکریہ ادا کریندے آکھیے جو بھارت دے جارحانہ اقدامات نال علاقائی امن اتے استحکام کوں وݙا خطرہ اے۔ صدر مملکت مذاکرات اتے سفارت کاری سانگے پاکستان دا عزم دوہریندے ݙوہیں ملکاں دے باہمی مفاد اچ ایران نال تجارت ودھاوݨ تے وی زور ݙتے۔ ملاقات اچ فریقین غزہ دی صورتحال تے وی گالھ مہاڑ کیتی۔ فریقین غزہ اتے مغربی کنارے اچ اسرائیلی فوجاں ولوں جاری مظالم، انسانی حقوق دی خلاف ورزیاں دی مذمت کیتی۔ ایرانی وزیر خارجہ ایرانی صدر ولوں صدر آصف علی زرداری کوں نیک خواہشات وی ݙتن۔
