اسلام آباد۔6مئی(اے پی پی)صدرِ مملکت آصف علی زرداری روس نال وپار، سرمایہ کاری، ٹیکنالوجی اتے عوامی سطح تے رابطیاں دے شعبیاں اچ ݙوطرفہ تعاون ٻیا ودھاوݨ دا عزم دوہرائے۔ او روسی فیڈریشن دی جنگ اچ فتح دی 80 ویں سالگرہ سانڳے تھیوݨ آلی ہک تقریب نال خطاب کریندے پئے ہن۔ انہاں پاکستان اتے روس دے تعلقات اچ ودھدی پیش رفت کوں اڳونہا کیتا اتے اعتماد ݙکھائے جو ݙوہاں ملکاں دے اڄوکے اعلیٰ سطح دے رابطیاں، سانجھے اشتراک باہمی تعلقات دی ہک چنڳی سلھ رکھی اے۔ صدر یقین کیتے جو پاکستان اتے روس وچال سنڳت ٻئی تکڑی تھیسی، ݙوہاں ملکاں وچال وپار، سرمایہ کاری، ٹیکنالوجی اتے عوام دے رابطیاں دے میدان اچ تعاون تکڑا کرݨ دی ودھ صلاحیت موجود اے۔ صدرِ مملکت روسی صدر ولادی میر پیوٹن، روسی حکومت اتے عوام کوں ایں موقع تے دلوں مبارک ݙیندے آکھیے جو اے فتح روسی عوام دی استقامت، قوت اتے امن و خوشحالی سانڳے انہاں دے پکے عزم دی نشانی اے۔ انہاں آکھیا جو وادیِ سندھ دے لوک جیڑھے اڄ دے پاکستان اچ وسدن، انہاں وی نازی ازم دے خلاف جنگ اچ برطانوی فوج نال رل تے اہم کردار ادا کیتے۔ صدرمملکت آصف علی زرداری 2011ء اچ اپݨے دورہ روس دا ذکر کریندے صدر ولادی میر پیوٹن ولوں پاکستان-روس سنڳت ودھاوݨ سانڳے کیتاں کوششاں دی تعریف کیتی۔ انہاں روس کوں ہک “اہم عالمی طاقت” قرار ݙتے اتے خاص کر جنوبی ایشیا اچ امن و استحکام ودھاوݨ اتے پاکستان اتے بھارت وچال کشیدگی گھٹ کرݨ سانڳے روس دے کردار کوں منیے۔ صدرِ مملکت پاکستان اتے روس وچال مفاہمت اتے تعاون ودھاوݨ دا عزم دوہریندے خطے اے ڄڳ دے چنڳے مستقبل سانڳے رل تے کم کرݨ تے زور ݙتے۔
