نائب وزیراعظم دی بھارتی بزدلانہ حملیاں اچ 8 لوکاں دی شہادت 35 دے زخمی تھیوݨ دی تصدیق
اسلام آباد۔ 7 مئی (اے پی پی) نائب وزیراعظم اتے وزیر خارجہ محمد اسحاق ݙار اپݨی ٹیم سودھے ساری رات وزارت خارجہ اچ متحرک رہیے۔ ترجمان دفتر خارجہ جاری بیان اچ آکھیے جو محمد اسحاق ڈار صورتحال دی نگرانی دے نال نال ضروری احکامات جاری کریندے رہیے۔ نائب وزیراعظم بھارتی بزدلانہ حملیں اچ 8 لوکاں دی شہادت اتے 35 زخمی تھیوݨ دی تصدیق کیتی۔ نائب وزیر اعظم اتے وزیر خارجہ محمد اسحاق ݙار آکھیے جو ساریں توں ودھ شہادتاں احمد پور شرقیہ اچ تھئن۔ ترجمان دفتر خارجہ آکھیے جو نائب وزیراعظم دی ہدایت تے اقوام متحدہ اچ پاکستان دے مستقل مندوب بھارت ولوں حملے بارے سلامتی کونسل کوں ݙس ݙتے، پاکستان دے مستقل مندوب سلامتی کونسل کوں بھارتی جارحیت پاروں عالمی امن اتے سلامتی کوں خطرے بارے ݙسیے۔ اقوام متحدہ دی سلامتی کونسل کوں ݙسیا ڳئے جو پاکستان مناسب ویلھے اتے موقع تے بھارتی جارحیت دا باقاعدہ جواب ݙیوݨ دا حق رکھیندے۔ ترجمان آکھیے جو پاکستان اقوام متحدہ چارٹر دے آرٹیکل 51 تحت اپݨے دفاع دے حق اچ بھارتی جارحیت دے جواب دا حق رکھیندے۔
