اساکوں ݙر ہئی جو بھارت جارحیت کریسی ،وفاقی وزیر اطلاعات و نشریات عطاء اللہ تارڑ دی “بی بی سی” تے “سکائی نیوز”ٹی آر ٹی ورلڈ” نال ڳالھ مہاڑ

اسلام آباد – 7 مئی (اے پی پی) وفاقی وزیر اطلاعات و نشریات عطاء اللہ تارڑ آکھیے جو اساکوں ݙر ہئی جو بھارت جارحیت کریسی، بھارت عام شہریاں کوں نشانہ بݨائے، جئیں جہیں کوں نشانہ بݨایا ڳئے اتھاں دہشت گردی دے کیمپ کائنی ۔ او بین الاقوامی نشریاتی اداریاں “بی بی سی”، “سکائی نیوز” اتے “ٹی آر ٹی ورلڈ” نال ڳالھ مہاڑ کریندے پئے ہن۔ وفاقی وزیر اطلاعات آکھیے بھارت پاکستان دیاں پنج مختلف جہیں تے بلا اشتعال حملہ کیتے جئیں دے نتیجے اچ تریمتاں اتے نکے ٻال شہید تھئن ۔ انہاں آکھیے غیر ملکی اتے مقامی صحافیاں کوں ݙو ݙینھ پہلے لائن آف کنٹرول دے نیڑے انہاں سارے علاقیاں دا دورہ کرایا ڳیا جئیں بارے بھارت کُوڑا دعویٰ کیتے جو اتھاں دہشت گرداں دے کیمپ موجود ہن۔ عطاء اللہ تارڑ واضح کیتے جو پہلگام واقعے اچ پاکستان دے ملوث تھیوݨ دے کوئی ثبوت بھارت کنے موجود کائنی، اے علاقہ لائن آف کنٹرول توں 200 کلومیٹر پرے واقع اے اتے اے واقعہ بھارتی سکیورٹی فورسز دی ناکامی اے۔ انہاں بھارت ولوں شہری آبادی کوں نشانہ بݨاوݨ کوں ٻہوں افسوسناک اتے قابل مذمت قرار ݙتے۔ وفاقی وزیر اطلاعات آکھیے پاکستان دہشت گردی دے خلاف جنگ اچ فرنٹ لائن اسٹیٹ اے اتے خود وی دہشت گردی دا شکار اے۔ “اساں 90 ہزار توں ودھ جاناں دی قربانی ݙتی اے اتے اڄ وی اپݨے مغربی علاقیاں اتے سرحداں تے دہشت گرداں نال لڑدے پیوں ” وزیر اطلاعات آکھیے جو بھارت خود دہشت گردی دی سرگرمیاں اچ ملوث اے۔ جعفر ایکسپریس جیھے واقعات توں بعد وی بھارت مذمت تئیں کائنی کیتی۔ بھارت امریکہ، کینیڈا اتے آسٹریلیا اچ سکھاں دے قتل اچ ملوث اے۔ اساں کنے بھارت دے دہشت گردی اچ ملوث تھیوݨ دے پکے ثبوت موجود ہن جئیں اچ کلبھوشن یادیو دا کیس ساریں توں ودھ نمایاں اے جیڑھا بھارتی نیول افسر اتے دہشت گردی اچ ملوث پاتا ڳئے۔ عطاء اللہ تارڑ آکھیے پاکستان عالمی امن دا ضامن اے اتے اساں دہشت گرداں اتے دنیا وچال ہک کندھ ہیسے۔ پاکستان اڄ وی قیمتی جاناں دی قربانی ݙے تے دہشت گردی دے خلاف لڑدا پئے۔ اڄ وی بلوچستان اچ دہشت گرداں دے خلاف کارروائی کیتی ڳئی اے۔ وزیر اطلاعات آکھیے پاکستان کوں کہیں توں گھٹ نہ سمجھیا ونڄے۔ پاکستان بھارتی جارحیت دا بھرپور جواب ݙیندا پئے ۔ انہاں آکھیے وزیراعظم محمد شہباز شریف قومی سلامتی کمیٹی دا اجلاس اڄ سویرے سݙیے ۔ انہاں ݙسائے وزیراعظم محمد شہباز شریف سفارتی محاذ تے کئی ملکاں دے سفیراں نال ملاقاتاں کیتن اتے عالمی رہنماواں نال رابطے کیتن ۔ پاکستان پہلگام واقعے دی شفاف اتے غیر جانبدارانہ تحقیقات دی وی پیشکش کیتی اے۔ وفاقی وزیر زور ݙے تے آکھیے پاکستان کݙاہیں جارحیت اچ پہل کائنی کیتی پر اپݨے دفاع توں پچھوں نہ ہٹسی