اسلام آباد – 07(اے پی پی) پاکستان پیپلز پارٹی (پی پی پی) دے مرکزی رہنما ایم این اے حاجی رسول بخش چانڈیو پاک فوج دی بہادری کوں خراج تحسین پیش کریندے آکھیے جو بھارت جِیہڑے لڑاکا طیاریں تے ماݨ کریندا پیا ہئی پاک فوج دے شاہیناں او منٹاں وچ سوا کر ݙتن، ہݨ عالمی میڈیا وی ایں ڳالھ کوں منیے جو پاکستان بھارتی طیارے مار ݙِتن۔ ہک بیان اچ پاکستان پیپلز پارٹی دے مرکزی رہنما ایم این اے حاجی رسول بخش چانڈیو آکھیا جو پاکستان دا ہر ٻال اپݨے ملک دے دفاع کیتے دشمن دا مقابلہ کریسی، پاک فوج بھارت دا غرور توڑ ݙِتے، ہݨ او اڳوں ودھݨ توں پہلے سو واری سوچیسن۔ انہاں آکھیا جو پاکستان دے امن مذاکرات کوں ساݙی کمزوری سمجھیا ڳیا ٻھل پاکستان ہک ذمہ دار مُلک اے، ایں سانگے ایں ہر او پیشکش کیتی جیڑھی ہک ذمہ دار مُلک کریندے۔ انہاں آکھیا جیکر پاکستان چاہندا تاں ایں توں پہلے بھارت تے حملے دے ٻہوں سارے موقع موجود ہن جنہاں اچ جعفر ایکسپریس اتے سمجھوتہ ایکسپریس اتے دہشت گردی دی ہر کارروائی تے پاکستان حملہ کر سڳدا ہا۔ انہاں آکھیا جو بھارت دُنیا دا کلہا مُلک اے جیڑھا اپݨے ہی اداریاں دی ناکامی پاروں ݙوجھے مُلک تے حملہ کریندے۔ انہاں آکھیا جو دُنیا کوں ایں توں اندازہ لاوݨا چاہیدے جو بھارت خطے اتے پوری دُنیا کیتے کتنا وݙا خطرہ بݨ چکیے، بھارت جِیہڑے لڑاکا طیاریں تے ماݨ کریندا پیا ہئی پاک فوج دے شاہیناں او منٹاں وچ سوا کر ݙتن اتے رافیل رائتا بݨ ڳئے، ہݨ بین الاقوامی میڈیا وی ایں حقیقت منیندا پئے اتے بھارت کوں ایں توں ودھ ٻیا کیہڑا ثبوت چاہیدے جو پاکستان بھارتی طیارے مار ݙِتن؟ حاجی رسول بخش چانڈیو آکھیا جو مودی اتے بھارت دی ݙوجھی قیادت کتنے ویلھے تئیں اپݨی عوام نال کوڑ ٻولیندی رہسی۔
