پاکستان بھارتی جارحیت دا منہ بھن جواب ݙتے، پاک فوج صرف پندرہ منٹ دے فضائی معرکے وچ پنج بھارتی جنگی طیارے مار ݙھائے ، پاکستان اپݨے دفاع دا بھرپور حق رکھیندے، عطاء اللہ تارڑ

اسلام آباد۔8مئی (اے پی پی) وفاقی وزیر اطلاعات و نشریات عطاء اللہ تارڑ آکھیے جو پاکستان بھارتی جارحیت دا منہ بھن جواب ݙتے، پاکستان عالمی قانون موجب دفاع دا حق استعمال کریندے ہوئیں پنج بھارتی جنگی طیارے مار ݙھائے ۔الجزیرہ ٹی وی نال خصوصی ڳالھ مہاڑ کریندے ہوئیں وفاقی وزیر اطلاعات آکھیے جو بھارت بغیر کہیں جواز دے عام شہریاں تے حملہ کیتے، جئیں دے جواب وچ پاکستان اپݨے دفاع وچ پنج بھارتی جنگی طیارے مار ڈھائے ۔ انہاں آکھیے جو بھارت پاکستان دی علاقائی سلامتی اتے خودمختاری دی خلاف ورزی کیتی جئیں دے بعد پاک فوج کوں ویلھے اتے جاہ دا تعین خود کرݨ دی پوری آزادی ݙے ݙتی ڳئی۔ وزیر اطلاعات آکھیے جو پاکستان امن پسند ملک اے لیکن جݙاں ڳالھ ملکی دفاع اتے وقار دی ہووے تاں اساں موثر جواب ݙیوݨ دی پوری صلاحیت رکھیندوں ۔ انہاں آکھیے جو بھارتی فوج دے مقابلے وچ پاکستانی افواج ودھ تربیت یافتہ، پیشہ ور اتے موثر ہن جنہاں صرف پندرہ منٹ دے فضائی معرکے وچ بھارت دے جدید طیارے تباہ کیتے۔ عطاء اللہ تارڑ آکھیے جو پاکستان دی افواج اپݨی مہارت، پیشہ ورانہ صلاحیت اتے جنگی تیاری دا عملی مظاہرہ کیتے۔ انہاں آکھیے جو اساں دنیا کوں ݙکھا ݙتے جو پاکستان دی فوج دنیا دیاں بہترین افواج وچ شامل اے۔ بھارتی حملے دے جواز دے حوالے نال سوال تے انہاں آکھیے جو بھارت دی طرفوں پہلگام حملے دا الزام پاکستان تے لاتا ڳیا جݙاں جو حقیقت اے ہے جو بھارت خود اپݨی ناکامی کوں لکاوݨ اتے دہشت گردی دے خلاف پاکستان دی توجہ ہٹاوݨ کیتے اے حربہ اختیار کیتے۔ وزیر اطلاعات آکھیے جو پاکستان پہلگام حملے دی تحقیقات وچ تعاون دی پیشکش کیتی لیکن بھارتی حکومت ایں تے چُپ اے۔ انہاں آکھیے جو بھارت پاکستان کوں سندھ طاس معاہدے دی خلاف ورزی دے ذریعے پاݨی توں محروم نی کر سڳدا۔ جے بھارت پاݨی بند کرݨ یا رُخ موڑݨ دی کوشش کیتی تاں اے اعلان جنگ سمجھیا ویسی اتے پاکستان سخت جواب ݙیسی۔ وفاقی وزیر آکھیے جو وزیراعظم پاکستان عالمی رہنماواں نال رابطے کیتن اتے موجودہ صورتحال کوں مکاوݨ کیتے علاقائی اتے عالمی سطح تے کوششاں جاری ہن۔ انہاں آکھیے جو امریکی صدر ڈونلڈ ٹرمپ کشیدگی گھٹاوݨ دی خواہش دا اظہار کیتے لیکن موجودہ حالات وچ بھارت دی جارحیت پاروں کشیدگی وچ کمی دے آثار نظر نی آندے پئے۔ انہاں آکھیے جو نیشنل سیکیورٹی کمیٹی دے اجلاس وچ واضح کیتا ڳئے جو نہتے شہریاں، تریمتاں اتے ٻالاں تے حملے ہرگز برداشت نی کیتے ونڄ سڳدے۔ بھارت بغیر کہیں جواز اتے ثبوت دے پاکستان تے حملہ کرتے بین الاقوامی قوانین دی خلاف ورزی کیتی اے اتے اینکوں ایں دا جواب ݙیوݨا ہوسی۔ انہاں دا آکھݨ ہئی جو بھارت کوں کہیں وی ملک یا فریق توں ایں حملے تے حمایت نی ملی اتے بین الاقوامی برادری ݙوہیں ملکاں توں تحمل دا مظاہرہ کرݨ دا مطالبہ کیتے۔ وزیر اطلاعات اپݨی ڳالھ مہاڑ دے چھیکڑ تے آکھیے جو بھارت کوں پچھوں ہٹݨا ہوسی، نہ تاں نتیجے بھوڳݨے ہوسن۔ پاکستان اپݨے سارے دفاعی آپشنز محفوظ رکھیندے اتے اپݨے عوام اتے زمین دی حفاظت کیتے ہر ممکن اقدام کریسی۔