راولپنڈی۔ 8 مئی (اے پی پی) پاکستان دی مسلح افواج ترجمان لیفٹیننٹ جنرل احمد شریف چوہدری آکھیے جو پاکستان دی مسلح افواج ہک ٻئی بھارتی جارحیت ناکام بݨا ݙتی اے۔ پاک فوج راولپنڈی، بہاولپور، گوجرانوالہ، اٹک سودھے مختلف جہیں تے 12 ڈرونز مار ݙِتے۔ لاہور اَتے سندھ اچ ڈرون حملیں اچ ہک شہری شہید، پاک فوج دے 4 جوان زخمی تھی ڳئے۔ خمیس کوں میڈیا کوں بریفنگ ݙیندے ڈی جی آئی ایس پی آر لیفٹیننٹ جنرل احمد شریف چوہدری آکھیے جو بھارت گزریل رات ہک واری ول کھلی جارحیت کریندے ہوئیں پاکستانی فضائی حداں دی خلاف ورزی کیتی اے۔ مختلف شہراں اچ بھارت ولوں بھیجے ڳئے سارے 12 ہیروپ ڈرونز مار ݙِتے ڳئن ۔ لاہور، گوجرانوالہ، چکوال، راولپنڈی، اٹک، بہاولپور، میانو، چھور اَتے کراچی دے نیڑے مار ݙِتے ونڄݨ آلے بھارتی ڈرونز دا ملبہ جمع کیتا ویندا پئے۔ انہاں آکھیے جو افسوس دی ڳالھ اے جو لاہور اچ ہک ڈرون فوجی تنصیب کوں نشانہ بݨاوݨ اچ کامیاب تھی ڳئے جیں دے نتیجے اچ پاک فوج دے 4 جوان زخمی تھی ڳئن جݙاں جو آلات کوں جزوی ضیان پڄے۔ ترجمان پاک فوج آکھیے جو میانو سندھ اچ ڈرون سرگرمی دے نتیجے اچ ہک شہری شہید اَتے ہک زخمی تھئے۔ انہاں آکھیے جو بھارت 6 اَتے 7 مئی دی رات کوں پاکستان تے حملہ کرتے، ٻالاں اَتے ٻڈھیں سودھے نشوم شہریاں اتے مسیتاں کوں نشانہ بݨائے اَتے جواباً اینکوں جیڑھی ہزیمت چاوݨی پئی، جیں اچ ایندے 5 طیارے اَتے ٻہوں سارے ڈرون مار ݙِتے ڳئن، لائن آف کنٹرول تے اینکوں شدید جانی ضیان اَتے پوسٹاں دی تباہی دا سامݨا کرݨا پئے، ایندے بعد لڳدے جو بھارت عقل دے سارے رستے ونڄاوݨ دے نیڑے ہے ۔ ترجمان پاک فوج آکھیے جو بھارت رات جیڑھی جارحیت کیتی اے او ٻہوں اشتعال انگیزی اے اَتے تہاݙیاں فوجاں اینکوں مُنہ بھن جواب ݙِتے۔ انہاں آکھیے جو پاکستان اچ ہیروپ ڈرونز بھیجݨ دا عمل جاری اے اَتے افواج پاکستان انھاں کوں ہک ہک کرتے نشانہ بݨیندی پئی اے تے تباہ کریندی پئی اے ۔لیفٹیننٹ جنرل احمد شریف چوہدری آکھیے اقوام عالم ݙیکھدی پئی اے جو بھارت نہ صرف ایں خطے اتے پوری دنیا دے امن کوں خطرے اچ پیندا پئے اساں ہرقسم دے خطرے تے ہر قسم دی جارحیت نال نہ صرف نبݨݨ چنڳی طرح ڄاݨدوں ، نبݨدے پیوں بلکہ جارحیت کرݨ آلیں کوں سبق سکھاوݨ دا نہ صرف عزم رکھیندوں بلکہ ایں دی پوری صلاحیت رکھیندوں ۔انہاں آکھیے ایں وچ کوئی شک کائںی جو بھارت ایں ننگی جارحیت تے مبنی اقدامات دی قیمت ادا کریندا پئے تے ادا کریندا رہسی۔
