واشنگٹن ۔8 مئی (اے پی پی) امریکی صدر ڈونلڈ ٹرمپ بھارت اتے پاکستان کوں جنگ بند کرݨ دی اپیل کریندے ہوئیں آکھیے جو او امن معاہدے اچ ݙوہیں ملکاں دی مدد کرݨ سانڳے تیار ہن۔ انہاں گزریل ݙینھ وائٹ ہاؤس اچ آکھیے جو اے ٻہوں خوفناک اے ، میں ݙوہیں نال ملداں، ݙوہیں کوں چنڳی طرح ڄاݨداں تے میں انہاں کوں کم کریندا ݙیکھݨ چاہنداں ۔ میں انہاں کوں کشیدگی روکیندا ݙیکھݨ چاہنداں۔ انہاں آکھیے جو میں ݙوہیں کوں چنڳی طرح جاݨداں اتے میں انہاں کوں کم کریندا ݙیکھݨ چاہنداں تے امید اے جو او ہݨ رُک ویسن۔ امریکی صدر آکھیے جو پاکستان اتے بھارت ہک ݙوجھے کوں جواب ݙے ݙتے، ایں سانگے امید اے جو او ہݨ کشیدگی روک سڳدن پر میں ݙوہیں کوں جاݨداں۔ اساں ݙوہیں ملکاں نال ٻہوں چنڳے طریقے نال چلدوں ، ݙوہیں نال چنڳے تعلقات ہن اتے میں کشیدگی کوں رُکدے ݙیکھݨ چاہنداں ، میں مدد کرݨ سانگے کجھ کرسڳداں تاں میں کریساں۔
