اسلام آباد ۔ 8 مئی (اے پی پی) نائب وزیراعظم اتے وزیر خارجہ سینیٹر محمد اسحاق ڈار آکھیا اے جو بھارت دہشت گرداں دے بنیادی ڈھانچے دی موجودگی دا کوڑا بہانہ بݨا تے جاݨ ٻڄھ تے شہری علاقیاں کوں نشانہ بݨایا جئیں دے نتیجے اچ بے گناہ مرد، تریمتاں اتے بال شہید تھیے ، معصوم تریمتاں اتے بالاں سودھ عام شہریاں کوں ڄاݨ ٻڄھ تے نشانہ بݨاوݨ ہک شرمناک جرم اے ، اقوام متحدہ دے چارٹر دے آرٹیکل 51 دے مطابق پاکستان اپݨی پسند دے ویلھے اتے جاء تے بھارتی جارحیت دا جواب ݙیوݨ دا حق محفوظ رکھیندے ۔ اے ڳالھیں انہاں اسلام آباد اچ موجود سفیریں کوں بریفنگ ݙیندے ہوئیں کیتی ۔ نائب وزیراعظم آکھیا جو اے بریفنگ 6 اتے 7 مئی دی وچلی رات بھارتی جارحیت تے پاکستان دے نقطہ نظر توں آگاہ کرݨ سانڳے کیتی ویندی پئی اے ۔ انہاں آکھیا جو بھارت پاکستان اتے آزاد کشمیر اچ کئی حملے کیتے ہن ، ایں پاکستان دی خودمختاری دی خلاف ورزی کیتی اتے علاقائی امن تے استحکام کوں خطرے اچ پاتے ۔ نائب وزیراعظم آکھیا جو بھارت سیالکوٹ، شکر گڑھ، مریدکے اتے بہاولپور سودھ پاکستان دی خود مختار سرزمین دے اندر کئی جہیں تے میزائل، فضائی اتے ڈرون حملے کیتن ، آزاد کشمیر اچ کوٹلی اتے مظفرآباد وی متاثر تھیے ۔ محمد اسحاق ڈار آکھیا جو دہشت گرداں دے بنیادی ڈھانچے دی موجودگی دا کوڑا بہانہ بݨا تے انہاں بلا اشتعال اتے بلا جواز حملیاں ڄاݨ ٻڄھ تے شہری علاقیاں کوں نشانہ بݨایا ڳیا جئیں دے نتیجے اچ بے گناہ مرد، تریمتاں اتے بال شہید تھیے اتے ہݨ تئیں 26 بندیاں دے ہلاک اتے 46 دے زخمی تھیوݨ دیاں اطلاعواں ہن ۔ نائب وزیراعظم آکھیا جو معصوم تریمتاں اتے بالاں سودھ عام شہریاں کوں ڄاݨ بڄھ تے نشانہ بݨاوݨ ہک شرمناک جرم اے ، بھارتی حملیاں نال کجھ مسیتاں شہید یا انہاں کوں نقصان تھیے ۔ انہاں آکھیا جو عبادت گاہیں تے حملہ خاص طور تے مذمت دے قابل اقدام اے ۔ نائب وزیراعظم آکھیا جو بھارتی کارروائی توں تجارتی فضائی ٹریفک کوں تکڑا خطرہ تھی ڳے جئیں توں جہازاں اچ موجود ہزاراں مسافراں دیاں زندگیاں خطرے اچ پے ڳیاں ، کیوں جو بھارتی حملیاں دے ویلھے کئی مسافر پروازاں فضا اچ ہن ۔ انہاں آکھیا جو علیحدہ طور تے آزاد کشمیر اچ نیلم جہلم ہائیڈرو پاور پروجیکٹ کوں متعلقہ بین الاقوامی کنونشنز دی خلاف ورزی کریندے ہوئیں نشانہ بݨایا ڳیا ، اے کارروائی سندھ طاس معاہدہ کوں التواء اچ رکھݨ دے بھارت دے فیصلے اتے پاکستان کوں پاݨی دے بہاء دے حوالے نال جاری بیان بازی دے تناظر اچ اہمیت رکھیندی اے ، پاکستان انہاں غیر قنونی کارروائیاں کوں پاکستان دی خودمختاری اتے علاقائی سالمیت دی کھلم کھلا خلاف ورزی قرار ݙیندے ہوئیں مذمت کریندے ۔ انہاں آکھیا جو بین الاقوامی قنون دے تحت بھارتی اقدامات واضح طور تے جنگی کارروائیاں ہن ۔ نائب وزیراعظم آکھیا جو پاک فضائیہ آپݨے دفاع اچ بھارتی لڑاکا طیاراں نال دفاع وطن سانڳے مصروف عمل اے جڈاں جو ایں عمل اچ بھارت دے پنج لڑاکا طیارے اتے بغیر پائلٹ اُݙݨ آلے (یو اے ویز) کوں مار تے ݙھا ݙتا ڳئے ۔ انہاں آکھیا جو بھارتی اقدامات اقوام متحدہ دے چارٹر، بین الاقوامی قنون اتے بین ریاستی تعلقات دے ٻݨائے ڳئے اصولاں دی کھلی خلاف ورزی اے ، اے ٻہوں بدقسمتی دی گالھ اے جو بھارت دے لاپرواہانہ رویے ݙو جوہری ہتھیاراں نال لیس ریاستاں کوں ہک وݙے تنازعے دے نیڑے پڄا ݙتا اے ، بھارت دا جنگی جنون دنیا سانڳے سنگین تشویش دا باعث ہووݨا چاہیدا اے ۔ نائب وزیراعظم تے وزیر خارجہ آکھیا جو جنوبی ایشیاء اچ دنیا دی آبادی دا پنجواں حصہ آباد اے اتے او بھارت ولوں کیتے ڳئے غیر ذمہ دارانہ اقدامات کوں برداشت نی کر سڳدا ۔ انہاں آکھیا جو پہلگام حملے دے تناظر اچ بھارتی قیادت ہک واری ول دہشت گردی دی من گھڑت کہانی دا استعمال کریندے ہوئیں علاقائی امن کوں خطرے اچ سٹیا اے ۔ انہاں ہک واری ول پہلگام حملے کوں پاکستان نال جوڑݨ دی کہیں وی کوشش کوں مسترد کریندے ہوئیں آکھیا جو بھارت بغیر کہیں مصدقہ ثبوت یا معتبر تحقیقات دے پہلگام حملے دا الزام پاکستان تے لاتا ، 26 اپریل کوں وزیراعظم پاکستان ایں المناک واقعے دی غیر جانبدار تفتیش کاراں دے ذریعے شفاف اتے آزادانہ تحقیقات دی تجویز پیش کیتی ، اڄ تئیں بھارت ایں تعمیری تجویز دا باضابطہ طور تے کوئی جواب نی ݙتا بلکہ ایں دے بجائے ایں جنگ اتے جارحیت دا رستہ اختیار کیتا ۔ سینیٹر محمد اسحاق ڈار آکھیا جو اساں دہشت گرداں دے بنیادی ڈھانچے کوں نشانہ بݨاوݨ دے بے بنیاد بھارتی دعویاں کوں واضح طور تے مسترد کریندوں ۔ انہاں آکھیا جو پاکستان اپݨی سرزمین تے دہشت گرد کیمپاں دی موجودگی بارے اچ بھارتی دعویاں کوں سختی نال مسترد کریندا رہیے ، بین الاقوامی میڈیا 6 مئی 2025ء کوں کجھ نام نہاد ”دہشت گرد کیمپاں“ دے جہیں دا دورہ کیتا جڈاں جو 7 مئی کوں وی ایجھے دوریاں دا منصوبہ بݨایا ڳیا ہا ۔ انہاں آکھیا جو گزریل ݙو ہفتیاں وچال کئی ملکاں تحمل توں کم گھنݨ تے زور ݙتا ، اقوام متحدہ اتے اسلامی تعاون تنظیم سویں بین الاقوامی تنظیماں وی ایں بارے مشورہ کیتا لیکن اے ٻہوں افسوسناک اے جو بھارت انہاں مطالبیاں تے توجہ نی ݙتی ۔ نائب وزیراعظم آکھیا جو اساں گزریل ݙو ہفتیاں وچال آپݨے بین الاقوامی سانجھے داراں کوں بھارت دے ناپاک عزائم بارے ݙسیندے پئیوں ، بھارتی اقدامات توں نشابر تھیندے جو اساݙے خدشات ٹھیک ہن ، وزیراعظم پاکستان قومی سلامتی کمیٹی دے اجلاس دی صدارت کیتی ، اجلاس اچ ٻئی گالھیں دے نال نال اعلان کیتا ڳیا جو اقوام متحدہ دے چارٹر دے آرٹیکل 51 دے مطابق پاکستان اپݨی پسند دے ویلھے اتے جاء تے بھارتی جارحیت دا جواب ݙیوݨ دا حق محفوظ رکھیندے اتے اساں پوری قوت نال اپݨی خودمختاری اتے علاقائی سالمیت دے دفاع سانڳے پرعزم ہیسے ۔ انہاں آکھیا جو بین الاقوامی برادری کوں چاہیدے جو او بھارت کوں ایں غیر ذمہ دارانہ ، غیر قنونی اتے جنگی رویے سانڳے جوابدہ کرے۔
