اسلام آباد۔ 9 مئی (اے پی پی) نائب وزیراعظم تے وزیرِ خارجہ سینیٹر محمد اسحاق ڈار یورپی یونین دی اعلیٰ نمائندہ خارجہ امور و سلامتی پالیسی / کمیشن دی نائب صدر کاجا کالاس نال ٹیلیفونک ڳالھ مہاڑ کیتی۔ دفترِ خارجہ دے ترجمان ولوں جاری بیان موجب نائب وزیراعظم انہاں کوں پاکستان دے کئی شہراں تے بھارت دے غیر قانونی تے بلا اشتعال حملیں پاروں وَدھدی ہوئی علاقائی صورتحال دا ݙسائے جیں دے نتیجے اچ تریمتاں، ٻالاں تے ضعیف لوکاں سودھے بے گناہ شہریاں دی شہادت تھئی۔ انہاں ایں ڳالھ تے زور ݙتا جو پاکستان ایں حقیقت دے باوجود تحمل دا مظاہرہ کیتے جو بھارتی حملے اقوام متحدہ دے چارٹر دی خلاف ورزی ہن، جیہڑے علاقائی امن تے سلامتی کوں خطرے اچ پیندے پِن۔ انہاں پاکستان دی خودمختاری دے دفاع کیتے حکومت دے عزم دا اظہار کیتے۔ کاجا کالاس شہریاں دیاں جاناں دے ضیان تے تعزیت کیتی۔ انہاں ایں ڳالھ دا اعادہ کیتے جو ݙوہیں فریق تحمل دا مظاہرہ کرِن، ڳالھ مہاڑ تے سفارت کاری نال وَدھ کشیدگی رکواوݨ دا موقع ݙیون۔
