اسلام آباد۔ 9 مئی (اے پی پی) پاکستان بھارتی میڈیا دی طرفوں ایں تے پٹھان کوٹ، جیسلمیر تے سری نگر تے حملے کرݨ متعلق لاتے ڳئے بے بنیاد تے غیر ذمہ دارانہ الزامات کوں مکمل طور تے مسترد کریندے آکھیے جو اے دعوے مکمل طور تے بے بنیاد، سیاسی محرکات دے حامل تے لاپرواہ پروپیگنڈا مہم دا حصہ ہن جیں دا مقصد پاکستان کوں بدنام کرݨ اے۔ ترجمان دفتر خارجہ دی توں جاری بیان موجب کہیں معتبر تحقیقات دے بغیر پاکستان تے وَل وَل الزام لاوݨ دا لڳا ٻدھا انداز جارحیت دا جواز بݨاوݨ تے خطے کوں وَدھ عدم استحکام نال ݙوچار کرݨ دی دانستہ حکمت عملی دی عکاسی کریندے۔ ایں طرح دے اقدامات نہ صرف علاقائی امن کوں وَدھ خطرے اچ پیندن بلکہ سیاسی تے فوجی مقصد کیتے غلط معلومات توں ناجائز فیدہ چاوݨ کیتے مضطرب آمادگی کوں وی ظاہر کریندن ۔ ترجمان آکھیے جو اساں بین الاقوامی برادری تے زور ݙیندوں جو او ایں خطرناک رویے دا سنجیدگی نال نوٹس گھنے تے بھارت کوں تحمل تے ذمہ داری دا مشورہ ݙیوے۔ پاکستان دی خودمختاری تے علاقائی سالمیت دے تحفظ کیتے کوڑے ڈھونگ تے مبنی کہیں وی کشیدگی دا پورے عزم تے جوش نال مقابلہ کیتا ویسی۔ ترجمان آکھیے جو پاکستان امن کیتے ہوشیار تے بھرپور انداز اچ پرعزم اے لیکن او اشتعال انگیزی، تڑیاں یا گمراہ کرݨ دیاں کوششاں توں مرعوب نہ تھیسی تے جارحیت دیاں کارروائیاں دا جواب ݙیوݨ دا حق محفوظ رکھیندے۔ لاتے ڳئے انہاں الزامات کوں سختی نال مسترد کیتا ویندے۔
