راولپنڈی۔ 9 مئی (اے پی پی) پاک فوج بھارتی جارحیت دا منہ بھن جواب ݙیندے کنٹرول لائن تے جھنڈا پیر، کیلر سیکٹر اچ ڈوبہ مور پوسٹ، بٹالین ہیڈ کوارٹر سوجی اتے پیر کانٹھی سیکٹر اچ جبار اینڈ ترکھیاں کمپلیکس سودھے درجناں چوکیاں تباہ کرݙتن۔ سکیورٹی ذرائع موجب پاک فوج دی طرفوں حاجی پیر سیکٹر اچ پاکستان دی طرفوں بھارتی فوج دے خلاف موثر جوابی کارروائی کیتی ڳئی۔ پاک فوج بلا اشتعال فائرنگ کرݨ تے بھارتی فوج دی جھنڈا زیارت پوسٹ کوں تباہ کر ݙتے، جھنڈا زیارت پوسٹ دی تباہی نال دشمن دا بارا ضیان تھئے ۔ ایندے توں پہلے وی پاکستان دی موثر جوابی کارروائیاں نال کئی بھارتی چیک پوسٹاں تباہ تھی چکئن ۔ پاک فوج حاجی پیر سیکٹر تے بھارتی بلا اشتعال فائرنگ دا جواب ݙیندے بھارتی فوج دی رِنگ کنٹوئر پوسٹ اتے پوکران مارٹر بگھسر پوسٹ کوں وی تباہ کر ݙتے۔ پاک فوج لائن آف کنٹرول تے بھارت دیاں ترائے ٻیاں پوسٹاں تباہ کرݙتن جنہاں اچ کیلر سیکٹراچ دشمن دی مہیری پوسٹ خالصہ ٹاپ جݙاں جو رکھ چکری سیکٹر اچ دنا ٹاپ اتے ماؤنڈ پوسٹ شامل اے۔ پاک فوج دے تازہ ترین حملیں اچ دشمن کوں بارا ضیان تھئے ۔ ایں توں پہلے وی پاک فوج دی طرفوں دشمن دیاں ٻہوں ساریاں پوسٹاں کوں تباہ کر ݙتا ڳیا ہئی ۔ کنٹرول لائن تے مسلسل پوسٹاں دی تباہی نال دشمن بوکھلاہٹ دا شکار تھی چکے۔
