اسلام آباد۔ 9 مئی (اے پی پی) وفاقی وزیرِ قَومی غذائی تحفظ اَتے تحقیق رانا تنویر حسین آکھیا جو مُسلح افواج بھارتی عزائم کُوں خاک وِچ مِلا ݙِتّے ، پوری پارلیمان اَتے قَوم افواجِ پاکستان دے نال اِے۔ جمعے کوں قومی اسمبلی اچ ڳالھ مہاڑ کریندیں ہوئیں رانا تنویر حسین آکھیا جو بھارت دی پاکستان تے الزام تراشی بے بُنیاد اَتے حقائق دے مُنافی اِے، بھارت اپݨے غیر قانونی زیرِ تسلط جموں تے کشمیر وِچ جِہڑا ماحول پیدا کِیتا ہِے او دہشت گردی اِے، بھارت کُوں پاکستان دا وجود برداشت نئیں تھین٘دا، جݙݨ وی بھارت کُوں موقع مِلّے اُوں پاکستان کُوں نُقصان پُچاوݨ تُوں گریز نئیں کِیتا، پر ساݙی مُسلح افواج ہمیشہ اُنھاں دے ناپاک عزائم کُوں خاک وِچ مِلا ݙِتّے ۔ اُنھاں آکھیا جو جݙݨ بھارت اپݨے غیر قانونی زیرِ تسلط جموں تے کشمیر دی خصوصی حیثیت ختم کِیتی ہئی تاں اَساکُوں اُوں ویلھے این٘دا بھرپور جواب ݙیوݨا چاہیدا ہئی، موجودہ ویلھے بھارت اَتے اسرائیل دا گَٹھ جوڑ اِے، اسرائیل غزہ وِچ اَتے مودی بھارت دے غیر قانونی زیرِ تسلط جموں و کشمیر اَتے پاکستان وِچ جارحیت کرین٘دا پئے۔ مودی کُوں اے حقیقت ڄاݨݨی چاہیدی اِے جو پاکستان غزہ نئیں ، میکُوں میݙے حلقے تُوں نین٘گر فون کرین٘دے پئے ہِن جو ساکُوں بھارت دے خلاف لڑݨ کِیتے رجسٹر کِیتا ون٘ڄے، پوری پاکستانی قَوم افواجِ پاکستان دے نال اِے، ساݙی مُسلح افواج پوری دنیا دی بہترین افواج وِچ شامل ہِن، ساݙی مُسلح افواج دی پیشہ ورانہ مہارت کُوں اقوامِ متحدہ اَتے عالمی اِداریاں وی منیے۔ اُنھاں آکھیا جو ساݙے کول جدید ترین لڑاکا طیارے اَتے ہتھیاراں دے نال نال جذبہ ایمانی موجود ہِے، اساݙے شاہیناں وِچ دُنیا بھر وِچ پہلی واری رافال لڑاکا طیاریاں کُوں مار سٹیے۔ اگر مودی سمجھدے جو اوہ جارحیت کر تے الیکشن جِتّ ویسی تاں اے این٘دی نادانی اِے، مودی دا غرور خاک وِچ مِل ڳئے، پوری پارلیمان اَتے قَوم افواجِ پاکستان دے نال اِے، جݙݨ جو بھارت وِچ اپوزیشن مودی دیاں پالیسیاں تے سوال چاتے۔ اُنھاں آکھیا جو پاکستانی قَوم وِچ کوئی خوف و ہراس نئیں اَتے پوری قَوم مُتحد اِے۔ ہندوستان ہِک اَرب چالھی کروڑ دی آبادی دا مُلک اِے۔ مودی اُنھاں دا خیال کرے اَتے اُنھاں کُوں کہیں امتحان وِچ نہ پاوے۔
