اسلام آباد۔ 9 مئی (اے پی پی) وزیرِ دِفاع خواجہ محمد آصف آکھیا جو جیویں افواجِ پاکستان ایل او سی، ورکنگ باؤنڈری اَتے بین الاقوامی سرحد تے مُلک دا دِفاع اَتے مُقابلہ کرین٘دی پئی ہِے مُلک اَتے خطے دی تاریخ وِچ این٘دی کوئی مثال نئیں مِلدی، اَندرلے معاملات کُوں قَومی اِتفاقِ رائے نال حل کِیتا ویسی، دوست مُلک واضح طور تے پاکستان دے نال کَھڑن۔ جمعے کُوں قَومی اسمبلی وِچ بھارت دی جاری جارحیت بارے قَومی اسمبلی وِچ مولانا فضل الرحمان ولوں چاتے ڳئے نُکات دا جواب ڈیندیں ہوئیں وزیرِ دِفاع آکھیا جو دُنیا دا کوئی وی مُلک نئیں جئیں دے نال ساݙا رابطہ نہ ہووے، اَساں خلیجی مُلکاں دے نال روزانہ دی بُنیاد تے رابطے وِچ ہئیں، ایران دے وزیرِ خارجہ ݙو ݙینھ پہلے اِتھاں آئے اُنھاں دے نال مختلف معاملیاں تے ڳالھ مُہاڑ تھئی، وزیرِ خارجہ اسحاق ڈار دا یو اے ای، قطر، سعودی عرب اَتے چین دے نال روزانہ دی بُنیاد تے رابطہ تھین٘دے، اقوامِ متحدہ وِچ پاکستان دا مشن سلامتی کونسل اَتے ٻئے فورمز تے بھارت دے جارحانہ عزائم دا فعال انداز وِچ جواب ݙین٘دا پئے اَتے این٘دے نتائج وی سامݨے آندے پئِن، ہِک ݙو مُلکاں ہندوستان دی حمایت کِیتی ہِے پر وَدھ مُلک یا تاں نیوٹرل ہِن اَتے یا پاکستان دے مؤقف دی حمایت کرین٘دے پئن ، اساݙے دوست واضح طور تے پاکستان دے نال کَھڑن، ترکی، چین اَتے آذربائیجان واضح کر تے پاکستان دی حمایت وِچ سامݨے آئن ، پر ہندوستان دے نیڑے ترین حلیف مُلک وی اُنھاں دے نال نئیں کَھڑے۔ اسرائیل مسلمان اَتے اسلام دُشمنی وِچ بھارت دے نال ہِن۔ اُنھاں آکھیا جو مدارس دے طالبِ علم ساݙی ݙوجھی دِفاعی لائن ہِن، او دِینی تعلیم نال آراستہ ہِن اَتے اُنھاں کُوں شہری دِفاع دی لوڑھ کِیتے اِستعمال کِیتا ون٘ڄ سڳدے۔ وزیرِ دِفاع آکھیا جو ساݙی افواج جیویں ایل او سی، ورکنگ باؤنڈری اَتے بین الاقوامی سرحد تے جیویں مُلک دا دِفاع اَتے مُقابلہ کرین٘دی پئی ہِے مُلک اَتے خطے دی تاریخ وِچ این٘دی کوئی مثال نئیں مِلدی، اَساں اپݨے تُوں ست گُݨاں وَݙّی دِفاعی قوت دا مُقابلہ کرین٘دے پئیوں ، اَساں بھارت دے پنج جہاز ݙھائن اوہ وی تاریخ دا حصہ ہِے، کل دا ڈرون حملہ ساݙے لوکیشنز کُوں ڈیٹیکٹ کرݨ کِیتے کِیتا ڳیا اِیں کِیتے این٘کُوں نشانہ نئیں بݨایا ڳیا اَتے جݙݨ اے ڈرونز محفوظ حدُود وِچ آئے تاں این٘کُوں ماریا ڳئیا ۔ اُنھاں آکھیا جو اَندرلے معاملات کُوں قَومی اِتفاقِ رائے نال حل کِیتا ویسی، وزیرِ اعظم واشگاف اتحاد دا سنیھا ݙِتّا، وزیرِ خارجہ خارجہ محاذ تے تفصیلات نال ݙسیا، ایوان دا اجلاس وی جاری ہِے اَتے اَساں لمحہ بہ لمحہ ایوان اَتے قَوم کُوں آگاہ کرین٘دے رَہسُوں، کہیں کُوں شک نئیں ہووݨا چاہیدا جو پاکستان دی افواج اِیں ویلھے بھرپور جوابی کارروائیاں کرین٘دی پئی ہِے، پاکستان دی افواج بہادری نال مُلک دا دِفاع کرین٘دی پئی اِے، بھارت کُوں بھرپور جواب ݙِتّا وین٘دا پئے ، پاکستان دی قَوم کُوں اِطمینان ہووݨا چاہیدے جو بھارت دے عزائم کُوں ملیامیٹ کر ݙِتّا ڳئے، بھارتی عوام دے مُقابلے پاکستانی عوام دے نال اِے، حوصلے بُلند ہِن آندے کُجھ ݙینھاں وِچ ݙَسیسُوں جو ساݙی افواج کِیویں مُقابلہ کرین٘دی پئی اِے۔
