اسلام آباد۔ 9 مئی (اے پی پی) وفاقی وزیرِ اِطلاعات تے نشریات عطاء اللہ تارڑ آکھیا جو پاکستان کُوں بھارت تے روایتی جنگ وِچ نشابر اَتے فیصلہ کُن برتری حاصل تھی ڳئی اِے۔ پاکستان دی مُسلح افواج دُشمݨ دی جارحیت دا بھرپور اَتے مُنہہ ٻھن جواب ݙیندے ہوئیں بھارت دے پنج جنگی طیارے اَتے ہݨ تئیں 77 ڈرونز کُوں کامیابی نال مار سٹیے جِہڑا جو پاکستان دی فضائی صلاحیتاں اَتے فوجی برتری دا نشابر ثبوت اِے۔ جمعے کُوں اپݨے بیان وِچ وفاقی وزیرِ اِطلاعات آکھیا جو پاکستان ہِک پُرامن مُلک اِے جڈانجو کہیں وی جارحیت دے خلاف اپݨا دِفاع کرݨ ساݙا قانونی، اَخلاقی اَتے ریاستی حق اِے، پاکستان اپݨا اے حق ذِمّے واری نال اِستعمال کِیتے اَتے کریسی۔ اُنھاں آکھیا جو اڄوکے ݙینھاں وِچ بھارت نہ صرف عسکری محاذ تے اِشتعال اَنگیزی کِیتی بلکہ اپݨے عوام کُوں گُمراہ کرݨ کِیتے اَندرلے پاسے میڈیا تے بدترین پروپیگنڈا مہم شروع کِیتی اے بھارتی میڈیا تے مُنَظَّم انداز وِچ فیک نیوز، پراݨیاں تصویراں اَتے جعلی وڈیوز نال ہِک کوڑا بیانیہ گھڑیا ڳئے جِہڑا جو بھارتی حکومت دی گھبراہٹ، ناکامی اَتے بدحواسی دا مُنہہ ٻولین٘دا ثبوت اِے۔ اُنھاں آکھیا جو پاکستان بھارت دا کوڑا پروپیگنڈا بھرپور طریقے نال بے نقاب کِیتا جِین٘دے نال بھارت کُوں وَدھ ہَزیمت چاوݨی پئی۔ وفاقی وزیر آکھیا جو کوڑے بیانیے نال بھارت اپݨی ناکامی لُکاوݨ دی ناکام کوشش کِیتی جِین٘کُوں پوری دُنیا ݙٹھے اَتے بھارت کُوں وَدھ شرمندگی دا سامݨا کرݨا پئے۔
