حج دیاں ڈھیر ساری پروازاں رد اتے رُک گئن ، حج تے ونجݨ آلے آپݨے حاجیاں دے کیمپاں نال رابطے وچ رہن، وزارت مذہبی امور

اسلام آباد۔ 9 مئی (اے پی پی) وزارت مذہبی امور تے بین المذاہب ہم آہنگی آکھیا جو ہوائی اݙیاں تے فلائٹ آپریشن بند تھیوݨ پاروں ڈھیر ساریاں حج دیاں پروازاں رد اتےرُک گئن ہ، ایں واسطے حج تے ونجݨ آلے اپݨے حاجیاں دے کیمپاں نال رابطے وچ رہن۔ جمعے کوں وزارت مذہبی امور دے ترجمان موجب 7 توں 9 مئی وچال 13 حج دیاں پروازاں دا شیڈول متاثر تھیے۔ ترائے ݙینھ اچ 4 حج دیاں پروازاں رد، 9 پروازاں تاخیر دا شکار تھئیاں۔ اسلام آباد اتے لاہور توں سعودی ایئر لائن دیاں ݙو، ݙو حج دیاں پروازاں رد تھئن۔ لاہور توں ترائے، اسلام آباد، کوئٹہ توں ݙو، ݙو جݙاں جو ملتان اتے کراچی توں ہک، ہک حج دی پرواز تاخیر دا شکار تھئی ہے۔ فلائٹ آپریشن دی عارضی بندش پاروں 3 ہزار 80 حج تے ونجݨ آلیاں دا شیڈول متاثر تھیے۔ ودھ تر پروازاں کجھ گھنٹیاں دی تاخیر دے بعد حج تے ونجݨ آلیاں کوں گھن تے روانہ تھی گئِن۔ پروازاں دے رد تھیوݨ پاروں رہ ونڄݨ آلے 345 حج تے ونجݨ آلیاں کوں اسلام آباد توں پی آئی اے دی خصوصی پرواز توں جمعے کوں روانہ کر ݙتا ڳئے۔ ٻئے 540 حج تے ونجݨ آلیاں کوں اسلام آباد اتے لاہور توں خصوصی پروازاں دے ذریعے روانہ کیتا ویسی۔ وزارت مذہبی امور حج دیاں پروازاں دے شیڈول بارے معلومات دی ݙیوݨ کیتے ہیلپ لائن (0519216980) ٻݨا ݙتی اے۔ ہیلپ لائن تے کال کر تے حج تے ونجݨ آلے آپݨیاں پروازاں دے ویلھے اتے روانگی دے متعلق تازہ ترین معلومات حاصل کر سڳدن۔ حج تے ونجݨ آلیاں کوں ہدایت کیتی ویندی اے جو پروازاں بارے معلومات کیتے متعلقہ حاجیاں دے کیمپاں نال وی رابطے وچ رہن۔