اسلام آباد۔ 9 مئی (اے پی پی) وزیراعظم محمد شہباز شریف آکھیا جو آندے بجٹ وچ عام بندے کوں ریلیف ݙیوݨ حکومت دی پہلی ترجیح اے، غریب اتے وچلے طبقے دیاں مالی اوکھ گھٹ کرݨ کیتے سارے وسیلے استعمال کیتے ویسن۔ وزیراعظم آفس دے میڈیا ونگ ولوں جمعے کوں جاری بیان موجب وفاقی بجٹ 26-2025 دی تیاری بارے وزیراعظم محمد شہباز شریف دی صدارت اچ اہم اجلاس تھیا جیندے وچ نجی شعبے توں تعلق رکھݨ آلے مہان کاروباری شخصیات اتے ماہرین نال بجٹ تے صلاح مشورہ کیتا ڳیا۔ وزیراعظم اجلاس توں خطاب کریندیں ہوئیں آکھیا جو مُلخ دی ترقی اتے خوشحالی کیتے حکومت اتے نجی شعبے کوں رَل تے کم کرݨے، آندے بجٹ وچ عام بندے کوں ریلیف ݙیوݨ پہلی ترجیح اے، غریب اتے وچلے طبقے دیاں مالی اوکھ گھٹ کرݨ کیتے سارے وسیلے استعمال کیتے ویسن۔ وزیراعظم وفاقی بجٹ دی تیاری وچ برآمدات تے مبنی پائیدار ترقی تے توجہ ݙیوݨ دی ہدایت کریندیں ہوئیں آکھیا جو صنعتاں دے ودھارے اتے پیداوار وچ ودھارے کیتے منصوبیاں تے کم کیتا ویسی، نینگراں کوں پیشہ ورانہ تربیت ݙے تے اجوکے تقاضیاں نال ہم آہنگ کرݨ ساݙی حکومت دی ترجیح اے۔ انہاں وفاقی بجٹ تیار کریندے ہوئیں نویاں نوکریاں دے موقعے پیدا کرݨ تے خاص توجہ ݙیوݨ دی وی ہدایت کیتی۔ وزیراعظم آکھیا جو وفاقی بجٹ وچ زراعت، انفارمیشن ٹیکنالوجی، چھوٹے اتے وچلے درجے دے کاروباراں اتے ہاؤسنگ دے شعبیاں تے بھرپور توجہ ݙتی ویسی کیوں جو انہاں سارے شعبیاں وچ ڈھیر ساری گنجائش موجود اے۔ انہاں آکھیا جو پبلک پرائیویٹ پارٹنرشپ دے تحت منصوبیاں دا ودھارا آندے بجٹ وچ حکومتی ترجیح ہوسی۔ وزیراعظم آکھیا جو پاور سیکٹر وچ حکومتی اصلاحات دے مثبت نتیجے آندے پِن، صنعتاں کیتے بجلی دیاں قیمتاں وچ گھٹوتری صنعت اتے پیداوار دے ودھارے آلے پاسے ہک اہم قدم اے، حکومتی نظام کوں شفاف بݨاوݨ، کاروباری برادری، سرمایہ کاراں کوں سہولتاں ݙیوݨ بارے نال آٹومیشن اتے ڈیجیٹائزیشن کوں ودھارا ݙتا ویندا پئے۔ وزیراعظم آکھیا جو وفاقی حکومت دے حجم کوں گھٹ کرݨ دے حوالے نال رائٹ سائزنگ دا عمل آندے مالی سال وچ وی جاری رہسی۔ ایں موقع تے وزیراعظم کوں بریفنگ وچ ݙسایا ڳئے جو بجٹ دی تیاری بارے نجی شعبے نال صلاح مشورے دا عمل پچھلے ترائے مہینے توں جاری اے، بجٹ دی تیاری بارے معیشت دے مختلف شعبیاں نال سٹیک ہولڈرز دے نال مشاورتی سیشنز کیتے ڳئن، 30-2025 تک دا پنج سالہ ٹریڈ پالیسی فریم ورک جلدی مکمل کر گھدا ویسی، ای کامرس 2.0 فریم ورک وی تکمیل نیڑے ہے۔ ایندے علاوہ ٹیرف ریشنلائزیشن بارے وی لائحہ عمل ٻݨایا ویندا پئے، کاروباری شخصیات اتے ماہرین دے وفد حکومتی معاشی پالیسیاں تے اعتماد دا اظہار کریندے ہوئیں اپݨیاں اپݨیاں تجاویز ݙتب۔ وزیراعظم نجی شعبے توں تعلق رکھݨ آلے مہان کاروباری شخصیات اتے ماہرین دیاں تجاویز دا خیر مقدم کیتا اتے انہاں دیاں عمل کرݨ جوڳیاں تجاویز کوں بجٹ وچ شامل کرݨ دی ہدایت کیتی۔ اجلاس وچ وفاقی وزیر منصوبہ بندی احسن اقبال، وفاقی وزیر اقتصادی امور احد خان چیمہ، وفاقی وزیر خزانہ تے محصولات محمد اورنگزیب، وفاقی وزیر تجارت جام کمال خان، وفاقی وزیر انفارمیشن ٹیکنالوجی تے ٹیلی کام شزہ فاطمہ، وفاقی وزیر پاور ڈویژن سردار اویس احمد لغاری، وفاقی وزیر پٹرولیم علی پرویز ملک، وزیراعظم دے معاون خصوصی برائے صنعت تے پیداوار ہارون اختر اتے متعلقہ اعلیٰ سرکاری افسران شریک تھئے
