اسلام آباد۔9 مئی (اے پی پی) وفاقی وزیر قانون اعظم نذیر تارڑ آکھیا جو پہلگام واقعے دی تحقیقات دے حوالے نال پاکستان دی پیشکش دی نہ صرف اقوام عالم بلکہ اقوام متحدہ دے سیکرٹری جنرل وی تعریف کیتی ہے، دوست ملکاں دے مشکور ہیسے جنہاں ہمیشہ دی طرح اتے فولادی بھراواں وانڳ اساݙا ساتھ ݙتے، خون دے ہک ہک قطرے دا حساب گھدا ویندا پئے اتے گھدا ویسی، پاکستان کہیں ٻئے ملک تے جارحانہ حملہ کرݨ دا ارادہ نئیں رکھیندا ہئی اتے نہ رکھیندا ہئی مگر بین الاقوامی قانون اتے علاقائی روایات دے تحت وی ساکوں اے اختیار اے جو جݙاں کوئی ساکوں چھیڑیسی تاں اساں وی وڳ دے ماریسوں۔ جمعے کوں قومی اسمبلی دے اجلاس اچ بھارت دی جاری جارحیت پاروں پیدا تھیوݨ آلی صورتحال تے بحث اچ حصہ گھندیں ہوئیں اعظم نذیر تارڑ آکھیا جو او ایوان دے ہر رکن دے مشکور ہن جنہاں قومی سلامتی دے حوالے نال اوکھے ویلے اچ ہک زبان تھی دشمن کوں للکارا اتے واضح پیغام ݙتے جو اساں ہک ہیسے، اساں پاکستان ہیں اتے اساں ایں ملک دا دفاع کرݨ ڄاݨدوں ۔ انہاں آکھیا جو اوکھے ویلے اچ قوم کوں ہک زبان تھیوݨا چاہیدے، اے ڳالھ وی تھئی جو سیاسی تقسیم ختم تھیوݨی چاہیدی ماحول کوں بہتر کرݨ، اگر قومی یکجہتی دی ڳالھ تھیندی پئی اے تاں سیاسی ہم آہنگی دی ڳالھ وی تھیوݨی چاہیدی اے، سیاست دے ادنیٰ طالب علم دی حیثیت نال ایں ڳالھ توں سو فیصد متفق ہاں اتے اپوزیشن بنچاں تے ٻیٹھے ہوئے دوستاں توں صرف اے عرض کریساں جو وزیراعظم پاکستان فلور آف دی ہاؤس تے اے ڳالھ ہݨ وی آکھی اتے اوں ویلھے وی آکھی جݙاں او اپوزیشن لیڈر ہن جو آؤ رل ٻہہ تے ایں ملک دی معیشت کوں ٹھیک کروں، اگر میثاق جمہوریت دی وجہ توں جمہوریت مضبوط تھئی اتے ݙو اسمبلیاں اپݨی مدت پوری کر گھدی تاں آؤ میثاق معیشت کروں تاں جو ملک دی معاشی ترقی دا پہیہ تکھا تھیوے، اساں رل مل تے اڳاں ودھݨ چاہندوں ، وزیراعظم اسپیکر صاحب کوں وی پیشکش کیتی جو تساں اپوزیشن ارکان کوں اپݨے دفتر اچ سݙاؤ اتے جیہڑے وی شکوے اتے شکایتاں ہن او سݨݨ ، سیاست ہک ٻئے کوں گھسیٹݨ دا ناں نئیں ، سیاست دلیل اتے منطق نال ہک ٻئے کوں قائل کرݨ دا ناں اے، سیاست توں مکالمے کوں ختم کیتا ونڄے تاں سیاست فسطائیت بݨ ویندی ہے، دنیا دے ایں خطے اچ سیاست کوں فسطائیت دے نیڑے گھن آوݨ دی کوشش کیتی ڳئی لیکن ایں کوشش کوں صرف اتے صرف سیاستدان ہی ختم کر سڳدن، وزارت خارجہ 24 گھنٹے کم کریندی پئی ہے، وزیراعظم دا دفتر 24 گھنٹے دستیاب ہے، عسکری ادارے وی بہترین انداز اچ کم کریندے پئن، قومی سلامتی دی کمیٹی وی باضابطہ رابطیاں اچ رہندی اے، ایں ایوان دے توسط نال پاکستان دے انہاں غیور عوام دا وی شکریہ ادا کریندوں جیہڑے جرأت اتے بہادری دے نال بھارتی جارحیت دے خلاف کھڑن، خون دے ہک ہک قطرے دا حساب گھدا ویندا پئے اتے گھدا ویسی، پاکستان کہیں ٻئے ملک تے جارحانہ حملہ کرݨ دا ارادہ نئیں رکھیندا ہئی اتے نہ رکھیندا ہئی مگر بین الاقوامی قانون اتے علاقائی روایات دے تحت وی اے اختیار ہے جو جݙاں کوئی ساکوں چھیڑیسی تاں اساں وی وڳ دے مریسوں۔
