اسلام آباد۔9 مئی (اے پی پی) دفتر خارجہ دے ترجمان شفقت علی خان پاکستان اچ دہشت گردیں دے ڈھانچے کوں نشانہ ٻݨاوݨ دے بھارتی دعوے کوں کوڑا قرار ݙیندے ہوئیں آکھیا جو بھارتی حملیاں اچ تریمتیں اتے ٻالاں سودھے عام شہری ماریے ڳئن۔ ترجمان دفتر خارجہ جمعے کوں اتھاں ہفتہ وار پریس بریفنگ اچ آکھیا جو پاکستان اتے آزاد کشمیر اچ بھارتی جارحیت اچ کجھ مسیتاں کوں وی شہید کیتا ڳئے یا نقصان پُڄایا ڳیا، اینویں نیلم جہلم ہائیڈرو الیکٹرک پراجیکٹ دے کجھ حصیاں کوں بھارتی گولہ باری نال نقصان پُڄے جیہڑا بین الاقوامی کنونشنز دی خلاف ورزی اے۔ انہاں مطالبہ کیتا جو بھارت کوں انہاں جرائم دا جوابدہ تھیوݨا چاہیدے۔ ترجمان دفتر خارجہ پہلگام حملے کوں پاکستان نال جوڑݨ دی بھارتی کوششاں کوں وی مسترد کر ݙتا۔ انہاں آکھیا جو جنوبی ایشیا ٻہوں سارے ملکاں دا گھر اے اتے اے خطہ بھارت دے غیر ذمہ دارانہ اقدامات دا متحمل نی تھی سڳدا۔ ترجمان آکھیا جو بھارتی قیادت پہلگام حملے دے تناظر اچ ہک واری ول دہشت گردی دی مظلومیت دی آپݨی شرمناک داستان کوں اڳوں ودھایے۔ انہاں آکھیا جو بھارتی جارحیت اتے اقدامات نال علاقائی امن کوں خطرہ اے۔ ترجمان آکھیا جو اقوام متحدہ اتے اسلامی تعاون تنظیم سویں بین الاقوامی اداریاں دے نال دنیا بھر دے ٻہوں سارے ملکاں گزریل ݙو ہفتیاں اچ تحمل نال کم گھنݨ دی اپیل کیتی ہئی، اے ڳالھ ٻہوں افسوسناک اے جو بھارت انہاں مطالبیاں تے توجہ نئیں ݙتی۔ بین الاقوامی برادری کوں چاہیدے جو او بھارت کوں اوندے غیر ذمہ دارانہ، غیر قانونی اتے جارحانہ طرز عمل کیتے جوابدہ بݨاوے۔ انہاں یاد ݙیوایا جو بھارت دے سیکرٹری خارجہ گزریل ݙینہہ پاکستان تے ٻہوں سارے الزامات لائے جیہڑے من گھڑت اتے بے بنیاد ہن۔ انہاں آکھیا جو اے دعویٰ جو پاکستان پہلگام حملے دے ذریعے حالات کوں ٻیا خراب کیتے، مکمل طور تے مضحکہ خیز اے۔ انہاں آکھیا جو اڄ تئیں بھارت ایں دعوے کوں سچا ثابت کرݨ کیتے کوئی قابل اعتماد ثبوت پیش نئیں کر سڳیا۔ شفقت علی خان ایں ڳالھ تے حیرت دا اظہار کیتا جو بھارتی حکومت پہلگام حملے بارے گمنام اتے مشکوک سوشل میڈیا پوسٹ کوں اہمیت ݙتی۔ انہاں سوال چاتا جو کیا دنیا دے کہیں وی ملک کوں کجھ سوشل میڈیا پوسٹس دی بنیاد تے کہیں ٻئے ملک تے حملہ کرݨ دی موکل ݙتی ونڄ سڳدی اے۔ ترجمان آکھیا جو بھارت جیوری، جج اتے جلاد دے طور تے کم کرݨ دی کوشش کریندا پئے۔ انہاں آکھیا جو بمبئی اتے پٹھانکوٹ واقعات دی تحقیقات اچ گزریل کئی سالاں توں بھارت دے تعاون نہ کرݨ دے رویے پاروں پیش رفت نئیں تھی سڳی۔ ترجمان آکھیا جو بھارت آپ کوں دہشت گردی دے شکار دے طور تے پیش کرݨ دی کوشش کریندا پئے اتے او پاکستان اچ دہشت گردی دی منصوبہ بندی، حمایت اتے ایں دی حوصلہ افزائی اچ آپݨے کردار کوں سوکھیں نظر انداز کریندا پئے۔ انہاں کلبھوشن یادیو دے کیس دی مثال ݙیندے ہوئیں آکھیا جو ’اے کوئی راز نئیں جو بھارت دا ٹارگٹڈ قتل اتے ٻیاں تخریبی سرگرمیاں دا نیٹ ورک عالمی سطح تے کھنڈ ڳئے۔ ترجمان نشاندہی کیتی جو پہلگام تے حملہ پاکستان نئیں کیتا بلکہ ایں دے برعکس بھارت پاکستان دے کئی علاقیاں تے حملہ کیتا اتے اے جو پاکستان اپݨے دفاع کیتے اقوام متحدہ دے چارٹر اچ درج سارے اقدامات دا حق محفوظ رکھیندے۔
