اسلام آباد۔9 مئی (اے پی پی) نائب وزیراعظم اتے وزیر خارجہ سینیٹر محمد اسحاق ڈار کوں جاپان دے وزیر خارجہ ایوا تاکیشی جمعے کوں ٹیلیفون کیتا۔ دفتر خارجہ موجب نائب وزیراعظم انہاں کوں پاکستان دے ٻہوں سارے شہراں تے بھارت دے غیر قانونی اتے بلا اشتعال حملیاں پاروں پیدا تھیوݨ آلی علاقائی صورتحال دا ݙسیا جیندے نتیجے اچ تریمتیں، ٻالاں اتے بزرگاں سودھے بے گناہ شہری شہید تھئے۔ انہاں آکھیا جو بھارتی جارحیت نال علاقائی امن تے سلامتی کوں خطرہ اے، پاکستان بین الاقوامی قوانین اتے اقوام متحدہ دے چارٹر دی انہاں خلاف ورزیاں دے پیش نظر تحمل دا مظاہرہ کیتے۔ انہاں آکھیا جو حکومت پاکستان ملک دی خود مختاری اتے علاقائی سالمیت دے دفاع کیتے پرعزم اے۔ جاپان دے وزیر خارجہ بدلدی ہوئی صورتحال تے تشویش دا اظہار کیتا اتے معصوم شہریاں دی جاناں دے ضیان تے تعزیت کیتی۔ انہاں زور ݙتا جو ݙوہیں فریق تحمل دا مظاہرہ کرِن، خطے اچ امن تے استحکام کیتے مذاکرات اتے سفارت کاری دی اجازت ݙتی ونڄے۔
