راولپنڈی( 09 مئی اے پی پی) پاکستان دی مسلح افواج دے ترجمان لیفٹیننٹ جنرل احمد شریف چوہدری آکھیا جو پاکستان ڈرون یا راکٹ حملے دا آغاز نئیں کیتا، نہ ای کوئی فضائی حملہ کیتے، صرف چھوٹے ہتھیاراں نال بھارتی فوجی چوکیاں تے جوابی کارروائی کیتی ویندی پئی اے۔ بھارت مہم چلائی جو پاکستان ڈرون اتے فضائی حملے کیتے، جیہڑا جو کُوڑ اتے افسانہ اے، 21 ویں صدی دی جنگ اچ ہر حملے دا الیکٹرانک ثبوت ہوندا اے، اگر پاکستان کوئی میزائل حملہ کیتا ہوندا تاں اُندا کوئی الیکٹرانک ثبوت ہوندا۔ پہلگام واقعے کوں جواز بݨا تے کیتی ونڄݨ آلی جارحیت تے بھارت کوں جج، جیوری اتے سزا ݙیوݨ آلا بݨݨ دی موکل نئیں ݙتی ونڄ سڳدی۔ او جمعہ کوں ترک میڈیا نال ڳالھ مہاڑ کریندے پئے ہن۔ ڈی جی آئی ایس پی آر دا آکھݨ ہا جو بھارت ولوں لائن آف کنٹرول تے فائرنگ اتے گولہ باری کیتی ویندی پئی اے، بھارتی افواج جاݨ ٻُجھ تے پاکستانی شہری آبادی کوں نشانہ بݨیندی پئی اے، جنہاں بھارتی پوسٹاں توں شہریاں تے فائرنگ تھیندی پئی اے صرف اُنہیں پوسٹاں تے جوابی کارروائی کریندے پئے ہیں۔ اُنہیں آکھیا جو بھارتی دعویٰ اے جو اُنہاں پاکستانی طیارے ݙھائے تاں ول اُندا ملبہ کتھاں اے؟ اگر اُنہیں دے کول ساݙے پائلٹ ہِن تاں او کتھاں ہِن؟ بھارت اُتھاں بین الاقوامی میڈیا کوں چُپ کر ڈتے، ہݨ بھارتی میڈیا فرضی کہانیاں بݨیندا پئے جیہڑیاں مضحکہ خیز بݨ چُکین، جݙاں اساں جواب ݙیسوں تاں دُنیا آپ سُݨسی ، اساں کوں بھارتی میڈیا دی لوڑھ نئیں۔ ڈی جی آئی ایس پی آر دا آکھݨ ہا جو بھارت دہشت گردی دے واقعات کوں بہانہ بݨا تے سیاسی مقاصد کیتے استعمال کریندا پئے، پاکستان پہلگام واقعے دے بعد غیر جانبدار، شفاف تحقیقات دی پیشکش کیتی ہئی، بھارت پہلگام واقعے دی غیر جانبدار اتے شفاف تحقیقات کراوݨ توں انکاری تھی ڳئے۔ اُنہیں آکھیا جو بھارت پاکستان اچ 6 مختلف جاہیں تے عبادت گاہیں تے حملے کیتے، بھارت بغیر ثبوت توں تریمتیں، ٻالاں اتے وݙیریاں کوں نشانہ بݨائے، پاکستان بھارتی الزامات دی سختی نال تردید کیتی اے، بھارتی دعوے دے ثبوت نئیں ݙٹھے، ایجھا کوئی ثبوت موجود ای کائنی، بھارت کوں جج، جیوری اتے سزا ݙیوݨ آلا بݨݨ دی موکل نئیں ݙتی ونڄ سڳدی۔
