اسلام آباد۔ 9 مئی(اے پی پی) وزیراعظم محمد شہباز شریف خطے اچ کشیدگی ڳھٹاوݨ اتے علاقائی امن سانڳے سعودی حکومت دی سفارتی کوششاں دی تعریف کریندے آکھیے جو بھارت دی بلااشتعال اتے بلاجواز جارحیت پاکستان دی خودمختاری اتے علاقائی سالمیت دی کھلی خلاف ورزی اے جیندے نال علاقائی امن و استحکام کوں سخت خطرات لاحق ہِن۔ اے ڳالھ انہاں اسلام آباد اچ سعودی وزیر مملکت برائے امور خارجہ عادل الجبیر نال ملݨ ویلھے آکھی ڄئیں وزیر اعظم ہائوس اسلام آباد اچ ملاقات کیتی اتے او پاکستان دے ہک ݙینہہ دے سرکاری دورے تے آئے ہوئن۔ ملاقات اچ وزیراعظم خادم الحرمین شریفین شاہ سلمان بن عبدالعزیز السعود دے نال نال ولی عہد اتے وزیراعظم شہزادہ محمد بن سلمان بن عبدالعزیز السعود کیتے نیک خواہشاں پچائن۔ وزیراعظم پاکستان اتے سعودی عرب دے تکڑے برادرانہ تعلقات ٻئے ودھݨ تے اطمینان کریندے ہر اوکھے ویلے اچ پاکستان دی مسلسل حمایت تے سعودی عرب دا شکریہ ادا کیتے۔ ملاقات اچ جنوبی ایشیا دی موجودہ صورتحال تے ڳالھ مہاڑ کریندے وزیراعظم ہندوستان دے پاکستان دے خلاف میزائل اتے ڈرون حملیاں دی سخت مذمت کیتی جیندے نال کئی بے گناہ شہری تریمتیں اتے ٻالاں دی وی شہادت تھئی اے اتے املاک کوں نقصان پُڄیے۔ اُنھاں ایں زور ݙتے جو بھارت دی بلااشتعال اتے بلاجواز جارحیت پاکستان دی خودمختاری اتے علاقائی سالمیت دی کھلی خلاف ورزی ہے اتے ایں جارحیت نال علاقائی امن و استحکام کوں سخت خطرات لاحق ہِن۔ وزیراعظم پاکستان دی بہادر افواج کوں خراج تحسین پیش کیتا جنہاں دفاع وطن اچ مثالی حوصلے اتے جرات ݙکھائی اتے دشمن دے ناپاک عزائم مٹی اچ رلا ݙتن۔ وزیراعظم آکھیا جو پاکستان اپݨی خودمختاری اتے علاقائی سالمیت دے دفاع کیتے پرعزم اے اتے ایکوں اقوام متحدہ دے چارٹر دے آرٹیکل 51 دے مطابق اپݨے دفاع کیتے اقدامات چاوݨ دا پورا پورا حق اے۔ وزیراعظم خطے اچ کشیدگی کوں گھٹ کرݨ اتے علاقائی امن قائم کرݨ کیتے سعودی حکومت دی سفارتی کوششاں دی تعریف کیتی۔
سعودی وزیر مملکت پاکستانی شہریاں دی قیمتی جاناں دے ضیان تے افسوس کیتے۔ اُنھاں آکھے جو سعودی عرب کوں جنوبی ایشیا دی موجودہ صورتحال تے چنتا اے۔ اُنھاں سعودی عرب ولوں کشیدگی اچ کمی دے نال نال پاکستان اتے بھارت وچال سارے تصفیہ طلب تنازعات بین الاقوامی قوانین اتے اقوام متحدہ دی سلامتی کونسل دی متعلقہ قرارداداں دے مطابق حل کرݨ تے زور ݙتا۔
