اسلام آباد۔09 مئی(اے پی پی) سرائیکی تریمت تحریک دی اگوانڑ ادی نیناں آکھیے جو مہرے والا سرائیکی وسیب دا سیاسی، ثقافتی اتے تہذیبی مرکز اے، سرائیکی اڳواݨ عاشق بزدار دی تریجھی پیڑھی قومی تحریک اچ شامل تھی ڳئی اے۔ اے ڳالھ انہاں اے پی پی دی سرائیکی نیوز سروس نال الیندے آکھی۔ انہاں آکھیا جو سرائیکی وسیب دی حق، حقوق دی جدوجہد دا مرکز اتے تحریکی کارکناں دی عظیم تربیت گاہ مہرے والا دے بھاڳوند، تحریکی اڳواݨ، انقلابی شاعر، دانشور عاشق خان بزدار دی اݨ کھٹ قومی خدمات تحریکی بھیݨیں، بھرانویں کیتے سوجھل لاٹ ہین۔ انہاں آکھیے جو سرائیکی مزاحمتی تحریک دی سُونہہ سُنڄاݨ عاشق خان بزدار دی تریجھی پیڑھی چینسر قسور بزدار دی شکل اچ سرائیکی تحریک دا حصہ بݨ جوت جڳاوݨ میدان اچ آڳئی اے.اَڄ توں 46 سال پہلے 8 مئی 1979ء کوں وسوں دے بھاڳوند عاشق خان بزدار دے گھر ݙو جاڑے ٻالاں قسور اتے یاسر دا ڄمݨا تھیا ھئی، اُنویں تاں عاشق خان بزدار دی سموری ٹٻری دی سرائیکی تحریک نال جڑت مثالی اے، پر قسور بزدار اَپݨی جڑت، جدوجہد پاروں اپݨے بابا سئیں دے سیاسی جانشین ہن، قسور دے جاڑے بھرا یاسر عباس بزدار وی سرائیکی قومی تحریک اچ ٻہوں سرگرم ہن، سردار عاشق خان بزدار دی لعلاں دی جوڑی، جاڑے بھرانویں یاسر عباس بزدار اتے قسور خان بزدار دا 8 مئی ڄمݨا ݙینہہ ہئی، ݙوھیں جاڑے بھرانویں کوں ڄمݨ ݙینہہ دیاں ڈھیر ڈھیر مبارخاں ہوون۔
ادی نیناں اے پی پی کوں ڈسایا جو میڈی دل نال دعا اے جو سرائیکی قومی تحریک دا مکتبہ فکر مہرے والا نت شاد، آباد رہوے، رب سوہݨا عاشق خان بزدار دا چھاں چھاندݨ تحریکی سنگتیں تے ہمیش سلامت رکھے اتے مولا قومی تحریک اچ تریجھی پیڑھی دی امدݨ کوں رنگ لاوے، جیویں عاشق بزدار 4 ڈہاکیاں توں سرائیکی زبان ثقافت کوں نشابر کرݨ سانگے “مہرے آلا” میلہ جاری رکھیا ہوئے، یقین اے قسور بزدار آپݨے ابے دے نال جیویں مونڈھے توں مونڈھا رلا دے ٹردن ایویں آندی نسل کوں وی جوڑ کے رکھسن۔(ڈاکٹر سعدیہ کمال)
