اسلام آباد۔09 مئی(اے پی پی)ٹانک توں سرائیکی تحریک دے اگوانڑ معوذ ارائیں ناویں جماعت کیتے سرائیکی دی کتاب ٹیکسٹ بک بورڈ پشاور توں چھپِ تے خوش تھیندے آکھیے جو اے خیبرپختونخوا اچ سرائیکی ٻولݨ تے پڑھݨ آلیاں کیتے وݙی خوشی دی خبر اے۔
اے پی پی دی سرائیکی نیوز سروس نال الیندے انہاں آکھیا جو قیصر انور اتے محمد یعقوب بابر دی لکھی جماعت نہم دی سرائیکی دی کتاب ٹیکسٹ بک بورڈ توں چھپ تے ڈیرہ اسماعیل خان اتے ٹانک پڄ چکی اے، ڄیڑھی ہݨ ٻالاں دے ہتھ آ تے طلباء کوں اپݨی ما ٻولی اتے ثقافت نال سنڄاݨ کریسی، ایں توں پہلے ڈاکٹر قیصر انور اتے محمد یعقوب بابڑ دیاں جماعت اول تا جماعت ہشتم تئیں کتاباں وی ڈیرہ اسماعیل خان اتے ٹانک دے تعلیمی اداروں اچ پڑھائیاں وینداں پین، اساں سنڳت دے مشکور ہیں ڄئیں ایں سانڳے رہنمائی اتے صلاح نال ہمت ودھائی۔ انہاں آکھیا جو خیبر پختونخواہ دی حکومت مبارک باد دی مستحق اے جیڑھی علاقائی زباناں دی ترقی و ترویج کیتے کم کریندی پئی اے۔(ڈاکٹر سعدیہ کمال)
