راولپنڈی۔ 9 مئی (اے پی پی) پاکستان دی مسلح افواج دے ترجمان لیفٹیننٹ جنرل احمد شریف چوہدری آکھیِے جو ہندوستان کولو پہلگام واقعے اِچ پاکستان دے ملوث ہووݨ دا رَتّی برابر وی ثبوت ہووے تاں سامݨے گھِن آوے، ایویں ہندوستان کولو ایں دعوے دا وی کوئی ثبوت کائینی جو پاکستان پِچھلے 48 گھنٹیاں تُوں ہندوستان تے حملے کریندا پئے، ہندوستان شواہد ݙیوݨ دی بجائے مقبوضہ کشمیر دے مسلماناں کوں نشانہ بݨاوݨ شروع کرݙِتِے، ہندوستان آپݨے اندرونی مسئلیاں تُوں توجہ ہٹاوݨ کیتے پاکستان تے الزام لیندا پئے، ڄیکر ہندوستان کوں اتنا چنتا اے جو پاکستان اوندے تے حملہ کرے تاں بے فکر رَہوے، اُوندی حملے دی سِک ضرور پوری کریسُوں، ویلھا اتے ڄاہ اساں ݙسیسوں۔ پاکستان ایئر فورس (پی اے ایف) دے ڈائریکٹر جنرل پبلک ریلیشنز (ڈی جی پی آر) ایئر وائس مارشل اورنگزیب احمد اَتے ڈپٹی چیف آف نیول اسٹاف (آپریشنز) وائس ایڈمرل راجہ ربنواز دے نال اسلام آباد اچ پریس کانفرنس اچ میڈیا کوں بریفنگ ݙیندے ڈی جی آئی ایس پی آر آکھیا جو سَبھ تُوں پہلے پہلگام واقعے دے حوالے نال ݙساں ڄیکر پہلگام دی لوکیشن ݙیکھو، اوندا زمینی فاصلہ 230 کلومیٹر اِے، بھارت الزام لائے جو اے دہشت گرد سرحد پار تُوں آئَن، اے پہاڑی علاقہ اِے، پہلگام اچ جائے وقوعہ سڑک تُوں تقریباً 5.3 کلومیٹر پرے اے اَتے ایندا پولیس اسٹیشن تُوں فاصلہ 1.2 کلومیٹر اِے۔ اُنہاں سلائیڈ تے واقعے دی ایف آئی آر ݙکھیندے ہوئے آکھیا جو پہلگام دا واقعہ 2 وڄ دے 20 منٹ تے تھیا جݙاں جو 2 وڄ دے 30 منٹ یعنی صرف 10 منٹ بعد پولیس جائے وقوع تے پڄی اے، تفتیش کر کے ول وی آندی اے اتے مقدمہ درج کر گِھندی اے، جݙاں جو ہِک پاسو دا رستہ 30 منٹ دا اے، کیا انسانی ططور تے اتنا تیزی نال اے ممکن ہے؟ اُنہاں آکھیا جو ایف آئی آر دے متن اچ آکھیا ڳئِے جو لوک سرحد پار تُوں آئے ہَن، تاں 10 منٹ وِچ اُنہاں نتیجہ کَڈھ گِھدّا، جݙاں جو وَدھ اِیہ وی آکھیا ڳیا جو اَنّدھادُھند فائرنگ کیتی ڳئی۔ اِیں حوالے نال سنجیدہ سوالات سامݨے آندن، بعد ہندوستان وِچ سوشل میڈیا ہینڈلز آکھݨ شروع کر ݙِتّا جو پاکستان پہلگام تے حملہ کیتے، مطلب اُنہاں کوں پتہ ہئی جو کیا تھئے، ٻھل ایندا ثبوت کوئی نئیں، بھارتی ٹی وی چینلز وی اِے ڳالھ آکھݨ شروع کر ݙِتّی جو اِیں حملے وِچ پاکستانی دہشت گرد ملوث ہِن۔ ڈی جی آئی ایس پی آر آکھیا جو اِے ڳالھیں وَل وَل ݙساوݨ اِیں کیتے ضروری ہِن جو اِے بنیاد اے، جِیندی وجہ تُوں اَڄ اَساں فوجی صورتحال ݙیھدے پِئے ہِیں، اِیں دی وجہ تُوں بے گناہ ٻالاں اَتے تِریمتیں کوں شہید کیتا ویندا پئے۔ ڈی جی آئی ایس پی آر اِیں واقعے دے حوالے نال مقبوضہ کشمیر دے شہریاں دی ڳالھ مہاڑ چلائی جِیندے وِچ او واقعے تے سوال چَیندے پِئے ہَن اَتے آھدے پِئے ہَن جو “اِتّھاں تے سَبھ تُوں وَدھ (بھارتی) فوج اِے، ڄیکر کوئی پوسٹ شیئر کریسی تاں اوکوں رات کوں ای چا گِھنسِن، اتنی بھارتی فوج اے تاں او کیا کریندی پئی اے؟” ہِک ٻئے شہری آکھیا جو منصوبہ بݨا تے اِیویں نہ کرو، کیا اے سیکیورٹی دی ناکامی کائینی؟ اُنہاں آکھیا جو بھارتی حکومت کولو شہریاں دے سوالاں دے کوئی جواب کائینا ہَن، اِیں کیتے اُنہاں توجہ ہٹاوݨ کیتے اے ڈرامہ رچا ڳئے اتے پاکستان تے حملہ کر ݙِتّا۔ اُنہاں آکھیا جو ہندوستان ہزاراں ٹوئٹر ہینڈلز اَتے سوشل میڈیا سائٹس تے پابندی لا ݙِتّی اے، اُنہاں پاکستان دے سارے ڈیجیٹل میڈیا تے ہندوستان اِچ پابندی لا ݙِتّی اے تاں جو اوندے لوک صرف اُوہ سُݨِن جو اُو ݙساوݨ چاہندن۔ ہندوستان کولو کوئی ثبوت کائینی جو پہلگام واقعے وِچ کون ملوث ہِے، اِے تُساں نئیں ڄاݨدے تاں تُساں فوجی محاذ کھول گِھدّا۔ لیفٹیننٹ جنرل احمد شریف سوال چاتا جو کیا اے پہلی واری اے جو ہندوستان اے سب کڄھ کیتے جو دہشت گردی دے واقعے کوں سیاسی مفادات کیتے استعمال کیتے؟ کائینا، اوندی ہِک تاریخ اے۔ اُنہاں سال 2000 وِچ چِتّی سنگھ پورا واقعے دے حوالے نال لیفٹیننٹ جنرل (ر) کے ایس گل دا بیان سُݨوایا، جِیندے وِچ او آھدے پِئے ہَن جو “اُنہاں پورا منصوبہ بݨایا، ساری متعلقہ معلومات کٹّھیاں کیتیاں، اُنہاں دی روٹین کیا اِے، کِتنے مرد اَتے تِریمتیں ہِن، ہتھیار کِتنّے ہِن اَتے اچانک ہِک رات آکھیا جو سارے ٻاہرو چیکنگ کیتے آؤ، اَساں آکھیا ہئی اِیںدے اچ بھارتی فوج ملوث ہئی، اتے جے پی دی حکومت پاکستان دے خلاف پروپیگنڈا کرݨ چاہندی ہئی”۔ ڈی جی آئی ایس پی آر دا آکھݨ ہئی جو ہندوستان دی معصوم لوکاں کوں مارݨ دی تاریخ رہی اے تاں جو سیاسی مقاصد حاصل کیتے ونڄ سڳِن۔ اُنہاں 2019 وِچ پلوامہ واقعے تے اُوں ویلے دے گورنر مقبوضہ کشمیر ستیا پال ملک دا بیان سُݨوایا، جِیندے وِچ او آھدے پِئے ہَن جو او اِیں واقعے کوں انتخابات کیتے استعمال کرݨ چاہندن جو اِے پاکستان کیتے اَتے ساݙے جوان مارے ڳئے اَتے ہُݨ اِنّھاں کوں ہَروِیسُوں اَتے اے حکومت دی چالو پالیسی ہئی۔ لیفٹیننٹ جنرل احمد شریف چوہدری آکھیا جو اِیں کیتے اَساں آھدے ہِیں جو اِے ڈرامہ اَتے پاکستان تُوں سرحد پار دہشت گردی اَتے جہادی تنظیماں دی حمایت دے من گھڑت الزامات دی بنیاد تے فوجی کارروائی دا سلسلہ بند تھیوݨا چاہیدِے۔ اُنہاں آکھیا جو اِیں کیتے حکومت پاکستان آکھیے ڄیکر تُہاݙے کولو کوئی شواہد ہِن تاں اُو ہِک آزاد اَتے غیر جانبدار کمیشن وِچ پیش کرو اَتے وَل ایکوں اِنّھاں شواہد دا جائزہ گھِنݨ ݙیو، تُہاکوں جج، جیوری اَتے سزا ݙیوݨ دا اختیار کِئیں ݙتے؟ ڈی جی آئی ایس پی آر دا آکھݨ ہئی جو بھارتی فوج غلطی نال سرحد پار کر ونڄݨ آلے پاکستانیاں اَتے کشمیریاں کوں پکڑ تے قید کر گِھندی اے، وَل اُنہاں تے تشدد کر تے مار ݙِتّا ویندِے اَتے اُنہاں کوں درانداز اَتے دہشت گرد قرار ݙے ݙِتّا ویندے۔ اُنہاں غیر ملکی صحافیاں کوں ہِک ٻال اَتے اُندے گھر آلیاں دی فوٹیج ݙکھا تے آکھیا جو ضیا مصطفیٰ کوں اکتوبر 2013 وِچ حراست وِچ گِھدّا ڳیا ہئی، وَل اوکوں اکتوبر 2021 وِچ دہشت گرد قرار ݙے تے شہید کر ݙِتّا ڳیا۔ اُنہاں آکھیا جو اِیں طرح پہلگام واقعے دے ݙو ݙینھاں دے بعد شہریاں کوں دہشت گرد قرار ݙے تے شہید کر ݙِتّا ڳیا۔ ڈی جی آئی ایس پی آر اِنّھاں لوکاں دے گھر آلیاں دی ڳالھ مہاڑ وی حاضرین کوں سُݨوائی جِیہڑے آھدے پِئے ہَن جو ݙوہیں بھرا ݙنگر بھالݨ کیتے ایل او سی دے نیڑے ڳئے ہَن جِنّھاں کوں بھارتی فوج فائرنگ کر تے شہید کر ݙِتّا۔ لیفٹیننٹ جنرل احمد شریف چوہدری غیر ملکی صحافیاں نال مخاطب تھی تے آکھیا جو اُو ونڄن اَتے اِنّھاں حقائق دی تصدیق کرِن۔ اُنہاں آکھیا جو بھارتی فوج روزانہ دی بنیاد تے معصوم شہریاں کوں قتل کر تے اُنہاں کوں دہشت گرد قرار ݙے ݙیندی اے، وَل من گھڑت اَتے بے بنیاد الزام پاکستان تے لا تے اُیندا پرچار عالمی میڈیا تے کیتا ویندِے اَتے وَل اِے آھدن جو اَساں حملہ کر ݙیسُوں، ہندوستان ایہو کڄھ کیتے۔ اُنہاں آکھیا جو دہشت گردی تاں پاکستان وِچ تھیندی پئی اے اَتے روزانہ تھیندی پئی اے اَتے ہندوستان دہشت گردی کوں اسپانسر کریندا پِئے۔ ڈی جی آئی ایس پی آر بھارتی وزیراعظم سودھا کئی بھارتی عہدیداراں دے کلپس ݙکھائے جِہڑے پاکستان دے خلاف زہر اُڳلیندے پِئے ہَن، ایندے بعد بھارتی بحریہ دے افسر کلبھوشن یادو دا کلپ ݙکھایا ڳیا جِیندے وِچ او پاکستان وِچ دہشت گردی کرواوݨ دا اعتراف کریندا پئِے۔ اِیں موقع تے ہتھیار سٹّݨ والے دہشت گرداں دے سرغنہ دی ڳالھ مہاڑ ݙکھائی ڳئی جِہڑا آھدا پِئے جو بلوچاں دی ہلاکت اَتے دہشت گردی دی کارروائیاں دے پِچھّوں ہندوستان دا ہَتّھ ہِے۔ ڈی جی آئی ایس پی آر آکھیا جو ہندوستان دا نیٹ ورک موجود اے، او دہشت گرداں دی تربیت کریندے اَتے اُنہاں کوں ہتھیار ݙیندِے، دہشت گردی دے کیمپ درحقیقت بھارتی سرزمین تے ہِن جِتّھوں پاکستان وِچ دہشت گردی کوں ودھارا ݙِتّا ویندا پئِے۔ ڈی جی آئی ایس پی آر جعفر ایکسپریس تے حملے دی فوٹیج ݙکھیندے ہوئے آکھیا جو بلوچ دہشت گرداں ویڈیو بݨاوݨ دے فوراً بعد ہندوستان بھیڄی اَتے اُتّھوں دے الیکٹرانک میڈیا تے سَبھ تُوں پہلے چلائی ڳئی۔ اِیں موقع تے بلوچ لبریشن آرمی دے ترجمان دی فوٹیج وی ݙکھائی ڳئی جِہڑا بھارتی میڈیا تے اِیں واقعے دی ذمے داری قبول کریندے ہوئے اوندی تفصیلات ݙسیندا پئے۔ اُنہاں آکھیا جو ہندوستان کینیڈا اَتے ٻئے مُلکاں وِچ وی دہشت گردی دی کارروائیاں کریندا پئے اَتے قتل دی کارروائیاں وِچ ملوث اِے۔ ڈی جی آئی ایس پی آر آکھیا جو حکومت پاکستان اَتے سیکیورٹی ایجنسیاں اِنّھاں دہشت گرداں دے گرد روز بہ روز گھیرا تنگ کریندی پئین، اَتے اِیں (پہلگام واقعے) دا مقصد انسداد دہشت گردی دی کارروائیاں تُوں سیکیورٹی ایجنسیاں دی توجہ ہٹاوݨ وی ہئی، اَساں اِے ڄاݨدے ہِیں کیوں جو ساݙے کول ایندے ناقابل تردید شواہد موجود ہِن کیوں جو پہلگام حملے دے بعد 100 تُوں وَدھ دہشت گرد پاکستان وِچ داخل تھئے ہَن جِنّھاں کوں بھارتی انٹیلی جنس ایجنسیاں دہشت گردی کرݨ کیتے بھیڄیا ہئی، اُنہاں وِچُّوں 71 دہشت گرداں کوں ہلاک کر ݙِتّا ڳیا ہئی۔ ڈی جی آئی ایس پی آر غیر ملکی صحافیاں کوں ہِک دہشت گرد اَتے بھارتی فوج دے میجر سندیپ دی پاکستان وِچ دہشت گردی دی کارروائی کیتے تھیوݨ والی ڳالھ مہاڑ سُݨوا تے آکھیا جو تُساں سُݨ گِھدّا جو پاکستان وِچ دہشت گردی کون کریندا پئِےَ؟ اُنہاں آکھیا جو ضرورت اِیں ڳالھ دی ہِے جو بھارتی حکومت سینما اَتے ڈرامیاں دی دنیا تُوں ٻاہر آوے، ڈرامے کرݨ بند کرے اَتے حقیقت دا سامݨا کرے۔ ڈی جی آئی ایس پی آر آکھیا جو جنوری 2024 تُوں پاکستان وِچ دہشت گردی دے 3700 واقعات تھئے ہِن جِیندے وِچ 1314 پاکستانی شہری شہید اَتے 2582 زخمی اَتے معذور تھئے، دہشت گردی دیاں اِے ساریاں کارروائیاں ہندوستان کیتن، اَتے وَل تُہاݙے کول پہلگام دے واقعے دا کوئی ثبوت کائینی۔ پاکستان دہشت گردی دے سامݨے کندھ اے اَتے اَساں دہشت گردی دا سامݨا کریندے پِئے ہِیں، جنوری 2024 دے بعد تُوں ہݨ تئیں 77816 انسداد دہشت گردی دے آپریشن تھئن، اَساں روزانہ دہشت گرداں نال لڑدے پِئے ہِیں اَتے ہندوستان آپݨے مفادات کیتے دہشت گردی دی پُشت پناہی کریندا پِئِے۔ ڈی جی آئی ایس پی آر دا آکھݨ ہئی جو پاکستان نہ صرف آپݨے لوکاں بلکہ دُنیا کیتے دہشت گردی نال لڑدا پئے اَتے ہندوستان اِیں راہ وِچ رُکاوٹ بݨݨ چاہندے، تُساں اندازہ کر سڳدے ہو جو خطے اَتے دُنیا کیتے ایندے نتائج کیا ہوسِن۔ اُنہاں آکھیا جو پہلگام واقعے دے شواہد پیش کرݨ دی بجائے بھارت اِیں واقعے دی بنیاد تے پاکستان تے حݨلہ آور تھی ڳئے، پاکستان پِچھلے 48 گھنٹیاں تُوں ہندوستان تے حملے کریندا پئے، ہندوستان شواہد ݙیوݨ دی بجائے مقبوضہ کشمیر دے مسلماناں کوں نشانہ بݨاوݨ شروع کرݙِتِے، ہندوستان آپݨے اندرونی مسئلیاں تُوں توجہ ہٹاوݨ کیتے پاکستان تے الزام لیندا پئے، ڄیکر ہندوستان کوں اتنا چنتا اے جو پاکستان اوندے تے حملہ کرے تاں بے فکر رَہوے، اُوندی حملے دی سِک ضرور پوری کریسُوں، ویلھا اتے ڄاہ اساں ݙسیسوں۔
