اسلام آباد۔10 مئی (اے پی پی) امریکی وزیر خارجہ مارکو روبیو ہفتے کوں نائب وزیراعظم اتے وزیر خارجہ سینیٹر محمد اسحاق ڈار نال ٹیلیفونک ڳالھ مہاڑ اچ ایں عزم دا اعادہ کیتا جو پاکستان اتے بھارت کوں اڄوکی صورتحال، کشیدگی کوں گھٹ کرݨ کیتے راہ ڳولݨا پوسی۔ امریکی وزیر خارجہ بھارتی وزیر خارجہ جے شنکر دے نال وی ڳالھ کیتی اتے ݙوہاں ملکاں وچال براہ راست رابطے کوں ولا قائم کرݨ تے زور ݙتا۔ امریکی محکمہ خارجہ دے ترجمان ٹیمی بروس ہک بیان اچ آکھیا جو انہاں مستقبل اچ تنازعات توں بچݨ کیتے تعمیری مذاکرات شروع کرݨ اچ امریکی مدد دی پیشکش وی کیتی۔ پاکستان دی وزارت خارجہ دے ہک سینئر اہلکار دے مطابق سینیٹر محمد اسحاق ڈار اتے امریکی وزیر خارجہ پاکستان تے بھارتی حملیاں اتے پاکستان دے ردعمل دے بعد جنوبی ایشیا دی اڄوکی صورتحال تے ڳالھ کیتی اتے ݙوہاں رہنماواں قریبی رابطہ برقرار رکھݨ تے وی اتفاق کیتا۔
