اسلام آباد۔10 مئی (اے پی پی) نائب وزیرِ اعظم محمد اسحاق ڈار آکھیا جو پاکستان اتے بھارت فوری جنگ بندی تے متفق تھی ڳئن۔ ہفتے کوں سماجی رابطے دی ویب سائٹ تے اپݨے ٹویٹ اچ نائب وزیرِ اعظم آکھیا جو پاکستان ہمیشہ خطے اچ امن اتے سلامتی کیتے کوشش کیتی اے، پاکستان امن دیاں کوششاں اچ آپݨی خودمختاری اتے علاقائی سالمیت تے کݙاہیں سمجھوتہ نئیں کیتا۔ ایں وچال امریکی صدر ڈونلڈ ٹرمپ ایکس تے اپݨی پوسٹ اچ آکھیا جو امریکہ دی ثالثی اچ مذاکرات دی لمبی رات دے بعد میکوں اے اعلان کریندیں ہوئیں خوشی محسوس تھیندی پئی اے جو ہندوستان اتے پاکستان مکمل اتے فوری جنگ بندی تے متفق تھی ڳئن۔ انہاں آکھیا جو دانشمندی اتے نہایت ذہانت دا مظاہرہ کرݨ تے ݙوہاں ملکاں کوں مبارخ ݙینداں اتے ایں معاملے تے توجہ ݙیوݨ تے شکر گزار ہاں۔
