اسلام آباد۔ 10 مئی (اے پی پی) ترجمان وزارت مذہبی امور آکھیا جو حج پروازاں ہݨ توں شیڈول دے مطابق سعودی عرب روانہ تھیسن۔ وزارت مذہبی امور دے ترجمان ہفتے کوں جاری بیان اچ آکھیا جو پاکستان دی فضائی حدود ہر قسم دی پروازاں کیتے مکمل بحال کر ݙتی ڳئی اے ایں کیتے حج آپریشن وی شیڈول دے مطابق بحال تھی ڳئے۔ ترجمان آکھیا جو فلائٹ آپریشن دی وقتاً فوقتاً بندش پاروں مجموعی طور 10 حج پروازاں منسوخ تھیاں، جِنّھاں اچوں لاہور توں ترائے، اسلام آباد توں ݙو جݙاں جو کراچی تے ملتان توں ہک ہک حج پرواز منسوخ تھئی اے۔ ترجمان وزارت مذہبی امور آکھیا جو فلائٹس منسوخی پاروں 2 ہزار 290 عازمین دا شیڈول متاثر تھئے۔ ترجمان وزارت مذہبی امور آکھیا جو ہک ہزار 277 عازمین کوں خصوصی پروازاں دے ذریعے روانہ کیتا ڳئے، باقی رہ ونڄݨ والے ہک ہزار 13 عازمین کوں جلدی خصوصی پروازاں دے ذریعے سعودی عرب روانہ کر ݙتا ویسی۔ ترجمان وزارت مذہبی امور آکھیا جو ہݨ تئیں 19 ہزار 669 پاکستانی عازمین سعودی عرب پُڄ ڳئن۔ ترجمان وزارت مذہبی امور آکھیا جو عازمین حج پروازاں دی معلومات کیتے متعلقہ حاجی کیمپاں نال رابطے اچ رہن۔
