اسلام آباد۔ 10 مئی (اے پی پی) نائب وزیراعظم تے وزیر خارجہ سینیٹر محمد اسحاق ڈار چین دے وزیر خارجہ وانگ یی نال ٹیلی فون تے ڳالھ مہاڑ کیتی تے بھارتی جارحیت دے بعد خطے اچ بدلدی ہوئی صورتحال تے پاکستان دے احتیاط نال کم گھندے ہوئیں موثر جوابی اقدامات بارے ݙسیا۔ ترجمان دفتر خارجہ ولوں ہفتے کوں جاری بیان موجب نائب وزیراعظم تے وزیر خارجہ اسحاق ڈار ڳالھ مہاڑ اچ چینی وزیر خارجہ وانگ یی کوں گزریل رات ہندوستان دی جارحیت دے بعد خطے اچ بدلدی ہوئی صورتحال تے پاکستان دے موثر جوابی اقدامات بارے ݙسیا۔ وزیر خارجہ وانگ یی پاکستان دے تحمل تے مشکل حالات اچ ذمہ دارانہ رویے دی تعریف کیتی۔ اُنّھاں ایں ڳالھ دی تصدیق کیتی جو چین بطور پاکستان دے اسٹریٹجیک تعاون دے ساتھی تے مضبوط دوست، پاکستان دی خودمختاری، علاقائی سالمیت تے قومی آزادی کوں برقرار رکھݨ اچ ہمیشہ دی طرح پاکستان دے نال کھڑا رہسی۔ ݙوہاں رہنماواں قریبی رابطے دی اہمیت تے زور ݙتا تے آوݨ والے ݙینھاں اچ مسلسل ہم آہنگی برقرار رکھݨ تے اتفاق کیتا۔
