اسلام آباد۔10 مئی (اے پی پی) وزیراعظم محمد شہباز شریف آکھیا جو خطے اچ امن کیتے قائدانہ اتے متحرک کردار ادا کرݨ تے اساں صدر ڈونلڈ ٹرمپ دا شکریہ ادا کریندوں۔ سماجی رابطے دی ویب سائٹ ایکس تے آپݨی پوسٹ اچ وزیراعظم آکھیا جو پاکستان، امریکا ولوں مسئلے دے حل اچ کردار ادا کرݨ تے شکریہ ادا کریندے، جینکوں اساں خطے دے امن اتے استحکام دے مفاد اچ قبول کیتے۔ وزیراعظم آکھیا جو اساں نائب صدر جے ڈی وینس اتے وزیر خارجہ مارکو روبیو دا وی شکریہ ادا کریندوں جنہاں جنوبی ایشیا اچ امن کیتے اہم کردار ادا کیتا۔ وزیراعظم آکھیا جو پاکستان سمجھدے جو اے ہک نویں شروعات اے، جیندے نال انہاں مسئلیاں دے حل دی راہ ہموار تھیسی جیڑھے خطے کوں عرصے توں متاثر کریندے پئن اتے امن، خوشحالی اتے استحکام دی راہ اچ رکاوٹ ہن۔
