اسلام آباد۔10مئی (اے پی پی) صدر مملکت آصف علی زرداری آرمی چیف جنرل سید عاصم منیر، ایئر چیف مارشل ظہیر احمد بابر سدھو اتے نیول چیف ایڈمرل نوید اشرف اتے ساریاں فوجاں کوں مبارخ ݙیندیں ہوئیں آکھیا جو انہاں دی بہادری اتے مسلسل محنت ایں جنگ اچ اساں کوں فتح ݙوائی اے۔ ایوان صدر دے پریس ونگ موجب پاک بھارت کشیدگی اتے جنگ بندی تے صدر مملکت آصف علی زرداری آپݨے بیان اچ آکھئے جو میکوں پاکستان دی مسلح افواج، پاک بحریہ اتے فضائیہ تے ہمیشہ توں یقین رہ گئے، اساں بھارتی جارحیت دا منہ توڑ جواب ݙتے، اساں بھارت دی نام نہاد فوجی قوت کوں سخت ٹھیس پُچائی اے۔ صدر مملکت آکھئے جو اج ساݙی قوم دا عزم بے مثال اے، اے عزم ساݙے وݙکیاں دے ݙو قومی نظریہ کوں تقویت ݙیندے۔ صدر مملکت آکھئے جو بحیثیت اسلامی ریاست اتے اللہ تے ساݙے ایمان اساں کوں اپنڑے حجم توں پنج گُنا ودھ ملک دے خلاف کھڑے تھیوݨ دی طاقت اتے ہمت عطا کیتی، میں آرمی چیف جنرل سید عاصم منیر، ایئر چیف مارشل ظہیر احمد بابر سدھو، نیول چیف ایڈمرل نوید اشرف اتے ساریاں فوجاں کوں مبارخ ݙیندوں جنہاں دی بہادری اتے مسلسل محنت ایں جنگ اچ اساں کوں فتح ݙوائی اے۔ صدر مملکت آکھئے جو قوم کوں خوشی مناوݨی چاہیدی اے اتے شہادت پاوݨ والیاں کیتے دعا وی کرݨی چاہیدی اے۔ انہاں آکھئے جو جنوبی ایشیا اچ پائیدار امن دا قیام تنازعہ جموں تے کشمیر دے اقوامِ متحدہ دی سلامتی کونسل دی قرارداداں دے مطابق حل اتے ݙوجھے مرکزی مسئلیاں خصوصی طور سندھ طاس معاہدہ دے حل اچ اے، میں انہاں ساریاں دوست ملکاں بشمول چین، امریکہ، ترکیہ، سعودی عرب اتے ایران دا شکریہ ادا کرینداں جیہڑے ایں مشکل گھڑی اچ ساݙے نال کھڑے تھئے۔ انہاں آکھئے جو پاکستان اشتعال انگیزی نی چاہندا، امن چاہندے مگر اساں آپݨی خودمختاری تے کݙاہیں سمجھوتہ نہ کریسوں۔
