اسلام آباد۔10مئی (اے پی پی) وزیراعظم محمد شہباز شریف آکھیا جو قوم کوں تاریخی جت مبارخ تھیوے، بہادر مسلح فوج دشمن کوں کھلی جارحیت تے اوندی زبان اچ جواب ݙے تے عسکری تاریخ دا سنہرا باب رقم کیتے، اے اساݙی غیرت اتے اصولاں دی جت اے۔ انہاں آکھیا جو کوئی ساڈی خود مختاری کوں چیلنج کرے تاں اساں سیسہ پلائی کندھ ٻݨ ویندوں۔وفاقی دارالحکومت وچ قوم توں خطاب کریندے ہوئیں محمد شہباز شریف آکھیا جو قوم کوں دل دی گہرائی نال مبارخ ݙینداں ، اللہ کوں او لوک پسند ہن جیہڑے اوندی راہ وچ صف بند تھی تے لڑدن، جیویں جو سیسہ پلائی کندھ۔۔انہاں آکھیا جو کوئی ساڈی خود مختاری کوں چیلنج کرے تاں اساں سیسہ پلائی کندھ ٻݨ ویندوں، دشمن جیہڑا کیتا او ہک کھلی جارحیت ہے، اساں بھارت کوں پہلگام واقعے دی تحقیقات دی پیش کش کیتی، دشمن ساڈی پیش کش دا مثبت جواب نہ ݙتا۔وزیراعظم آکھیا جو دشمن بزدلانہ حملہ کیتا تاں پاک فوج دشمن کوں منہ توڑ جواب ݙتا، دشمن میزائلاں نال معصوم شہریاں کوں نشانہ بݨاوݨ دی کوشش کیتی۔شہباز شریف آکھیا جو بھارت شہری آبادیاں کوں نشانہ بݨایا تاں ول اساں جواب ݙیوݨ دا فیصلہ کیتا، اساں طے کر گھدا ہئی جیہڑی ملاقات میز تے تھیوݨی ہئی او ہݨ میدان جنگ وچ تھیسی، رافیل شاہیناں دے نشانے تے آئے تاں فیل تھی ڳئے، شاہیناں کجھ گھنٹیاں وچ بھارتی فوج دیاں توپاں کوں ایجھا چپ کرائے جو تاریخ ہمیشہ یاد رکھیسی۔انہاں آکھیا جو پہلگام کوں جواز بݨا تے بھارت بلاوجہ جنگ مسلط کیتی، اساں دشمن کوں اوں دی زبان وچ جواب ݙتا، بہادر جواناں دا مقابلہ کون کر سڳدے، دشمن کوں پتہ لڳ ڳئے جو پاک فوج دے جواناں دشمن دے ناپاک عزائم کوں ناکام بݨایا۔وزیراعظم آکھیا جو میں امریکی صدر ڈونلڈ ٹرمپ، برادر اسلامی ممالک یو اے ای، قطر، سعودی عرب، ترکیہ سمیت ٻئے ملکاں دا شکریہ ادا کرݨا چاہندا جو انہاں ݙوہاں ممالک وچال جنگ بندی کیتے مثبت کردار ادا کیتا۔شہباز شریف آکھیا جو جنگ دے آغاز توں سیز فائر تئیں اپݨے قائد نواز شریف دی مدبرانہ قیادت، تجربہ کار رہنمائی تے شکریہ ادا کرینداں، صدر مملکت دی مشاورت تے، صحافیاں تے سوشل میڈیا دے بھراواں دا اظہار تشکر کرینداں۔انہاں آکھیا جو چین ہر مشکل وچ ساݙا ساتھ ݙتا، انتہائی قابل اعتماد دیرینہ دوست دا دل دی گہرائیاں نال شکریہ ادا کرینداں، چینی صدر تے عوام دا وی تعاون تے اظہار تشکر کریندوں۔وزیراعظم ٻیا آکھیا جو دشمن دے ایئربیس گولہ بارود تے جہاز ساݙے شاہیناں دے کامیاب حملیاں نال راکھ دا ڈھیر بݨ ڳئے، قوم دیاں دعاواں، مسلح افواج دیاں کوششاں نال اللہ رب العزت تاریخی فتح ݙتی، سروسز چیفس، افسران سودھے سارے جواناں کوں خراج تحسین پیش کرینداں، آرمی چیف جنرل سید عاصم منیر دا قوم ولوں دل دی اتھاہ گہرائیاں نال مشکور ہاں، شہباز شریف آخر وچ نعرہ وی لایا، ’’افواج پاکستان زندہ باد، پاکستان پائندہ باد‘‘۔
