اسلام آباد۔11 مئی (اے پی پی) بھارتی جارحیت دا تاریخی اتے منہ ٻھن جواب ݙیوݨ تے افواج پاکستان کوں خراج تحسین پیش کرݨ اتے اظہار یکجہتی کیتے ملک دے مختلف حصیاں اچ ریلیاں کڈھیاں ڳئین۔ شہر شہر، گلی گلی افواج پاکستان کوں خراج تحسین پیش کیتا ڳیا۔ افواج پاکستان دے جواناں تے پھلاں دیاں پتیاں نچھاور کیتیاں ڳیاں، پھلاں دے ہار پوائے ڳئے۔ لکی مروت اچ فتح دی خوشی اچ عوام دی وݙی تعداد قومی پرچم چا تے پاک فوج زندہ باد دے نعرے لاتے۔ شمالی وزیرستان باجوڑ اچ وی بھارتی جارحیت اتے افواج پاکستان دی فتح تے ریلی کݙھی ڳئی۔ چترال اچ وی غیور عوام افواج پاکستان کوں خراج تحسین پیش کرݨ کیتے سڑکاں تے نکل آئے۔ پشاور کینٹ اتے مردان اچ وی عوام دی وݙی تعداد بھارت دے خلاف فتح دا جشن مناوݨ سڑکاں تے آ ڳئی۔ ڈیرہ اسماعیل خان اتے ٹانک اچ وی عوام پاک فوج زندہ باد، بھارت مردہ باد دے نعرے لیندی سڑکاں تے نکل آئے۔ سوات اچ وی عوام دی وݙی تعداد آپݨی بہادر مسلح افواج کوں خراج تحسین پیش کیتا۔ مہمند، نوشہرہ اتے قلعہ بالا حصار اچ وی عوام فتح دی خوشی اچ ریلیاں کݙھی۔ ریلیاں اچ ہر مکتبہ فکر دے لوکاں شرکت کیتی ایں وچال عوام مٹھائیاں وی تقسیم کیتیاں۔ ریلیاں دے شرکاء اللہ دی ذات دا ایں شاندار فتح تے شکر ادا کیتا اتے افواج پاکستان دے حق اچ نعرے لائے۔
