اسلام آباد۔11 مئی (اے پی پی) وفاقی وزیر داخلہ محسن نقوی آکھیا جو اسلام آباد کوں ٹریفک دے نظام اتے سہولتاں بارے عالمی معیار دا شہر بݨاوݨ پہلی ترجیح اے، 22 مئی کوں جناح سکوائر مری روڈ انڈر پاس دا افتتاح تھیسی، منصوبہ ایں مہینے مکمل کیتا ویسی۔ وفاقی وزیر داخلہ محسن نقوی اتوار کوں جناح سکوائر مری روڈ انڈر پاس پراجیکٹ دا دورہ کیتا اتے پیش رفت دا جائزہ گھدا۔ وفاقی وزیر کوں ݙسایا ڳیا جو جناح سکوائر انڈر پاس دے ݙوہیں پاسیاں دیاں کندھاں مکمل تھی ڳئین جݙاں جو چھت دا کم شروع کر ݙتا ڳئے۔ محسن نقوی ایں موقع تے ڳالھ مہاڑ کریندیں ہوئیں آکھیا جو 22 مئی کوں جناح سکوائر مری روڈ انڈر پاس دا افتتاح تھیسی۔ انہاں پراجیکٹ تے جاری تعمیراتی سرگرمیاں دا معائنہ کیتا اتے ایں مہینے اچ 100 فیصد کم مکمل کرݨ دی ہدایت کیتی۔ وزیر داخلہ بارشاں دے باوجود ترقیاتی کم دی رفتار اتے معیار تے اطمینان دا اظہار کیتا اتے پراجیکٹ دے آسے پاسے گرین ایریاز اتے بہترین لینڈ سکیپنگ کرݨ دی ہدایت وی کیتی۔ انہاں انڈر پاس دے نیڑے زیر تعمیر پل دا وی معائنہ کیتا۔ وزیر داخلہ ایکسپریس وے تے تجاوزات دے خاتمے کیتے فوری کارروائی دا حکم ݙیندے ہوئیں آکھیا جو اسلام آباد کوں ٹریفک دے نظام اتے سہولتاں دے حوالے نال عالمی معیار دا شہر بݨاوݨ پہلی ترجیح اے۔ ایں موقع تے وفاقی وزیر کوں چیئرمین سی ڈی اے محمد علی رندھاوا پراجیکٹ دے حوالے نال بریفنگ اچ ݙسایا جو منصوبے تے ترقیاتی کم 75 فیصد تئیں مکمل تھی ڳئے، پراجیکٹ دیاں چار اچوں ترائے سلپ سڑکاں مکمل کر گھدیاں ڳئین اتے عوام دی سہولت کیتے ٹریفک بحال کر ݙتی ڳئی اے۔ انہاں ایں عزم دا اعادہ کیتا جو بارشاں اتے موسمی حالات دے باوجود ترقیاتی کم مقررہ ویلھے تے مکمل کیتا ویسی۔ وفاقی وزیر داخلہ محسن نقوی دے دورے دے موقع تے وفاقی سیکرٹری داخلہ، ڈپٹی کمشنر اسلام آباد اتے ٻئے افسران وی موجود ہن۔
