اسلام آباد۔11 مئی (اے پی پی) پاکستان امریکی صدر ڈونلڈ جے ٹرمپ دے پاک بھارت تعلقات بارے بیان دا خیر مقدم کریندیں ہوئیں آکھیا جو پاکستان اتے بھارت وچال اڄوکی جنگ بندی، مفاہمت دی حمایت اچ ٻئے دوست ریاستاں اتے امریکا دے تعمیری کردار کوں سراہندے ہئیں، جو کشیدگی اچ گھٹکی اتے علاقائی استحکام آلے پاسے ہک مثبت قدم اے۔ ترجمان دفتر خارجہ توں اتوار کوں جاری پریس ریلیز اچ آکھیا ڳیا جو اساں صدر ٹرمپ ولوں جموں تے کشمیر تنازعہ دے حل دیاں کوششاں دی حمایت تے آمادگی دے اظہار دی وی تعریف کریندوں۔ اے ہک ٻہوں پراݨا حل طلب مسئلہ اے جیندے جنوبی ایشیا اتے خطے توں ٻاہر امن تے سلامتی کیتے سنگین مضمرات ہن۔ پاکستان ایں ڳالھ دا اعادہ کریندے جو جموں تے کشمیر دے تنازعہ دا کوئی وی منصفانہ اتے پائیدار تصفیہ اقوام متحدہ دی سلامتی کونسل دیاں متعلقہ قرارداداں دے مطابق تھیوݨا چاہیدے اتے کشمیری عوام دے بنیادی حقوق بشمول انہاں دے ناقابل تنسیخ حق خودارادیت دے حصول کوں یقینی بݨاوݨا چاہیدے۔ پاکستان خطے اچ امن، سلامتی اتے خوشحالی دے فروغ دیاں کوششاں اچ امریکا اتے عالمی برادری دے نال شامل تھیوݨ کیتے پرعزم اے، اساں امریکا دے نال کثیر الجہتی سانجھے داری اتے خاص طور تے تجارت، سرمایہ کاری اتے اقتصادی تعاون دے شعبیاں اچ آپسی تعاون کوں ٻیا ودھاوݨ دا خواہشمند اے۔
