رحیم یار خان۔ 10 مئی (اے پی پی) جائیداد دے جھیڑے دی رنجش تے بھتریجے تیز دھار آلے نال ݙاݙی، چاچی تے چاچے دے ݙو نِکے ٻالاں کوں موت دے گھاٹ لاہ ڈتا، لاشاں کمرے اچ سٹ تے ٻھڄ ڳیا، واقعے تے ڈسٹرکٹ پولیس آفیسر دا سخت نوٹس، ملزم کوں فوری گرفتار کرݨ دے احکامات، پولیس موقع تے پُڄ تے مقتولین دیاں لاشاں قبضے اچ گھن تے پوسٹ مارٹم کیتے ہسپتال پڄا ڈتیاں۔ تفصیل موجب قومی شاہراہ تے واقع قصبہ ظفر آباد دے رہائشی امان اللہ پولیس پکار 15 تے ݙتی ونڄݨ آلی آپݨی اطلاع اچ ݙسیا جو او سودا سلف ڳھنݨ کیتے بازار ڳیا ہئی، گھر اچ ملزم بھتریجا خانپور دا رہائشی عمیر دے علاوہ 60 سالہ والدہ نذیراں بی بی، ذال ساجدہ پروین، 7 سالہ پُتر حسن تے 4 سالہ پُتر منیب الرحمن موجود ہن۔ واپس آوݨ تے گھر آلیاں کوں گھر اچ موجود نہ ݙیکھ تے پریشانی تھئی، ڳولݨ تے والدہ نذیراں بی بی، ذال ساجدہ پروین تے ٻالاں حسن تے منیب دیاں خون اچ لت پت لاشاں کمرے اچ پیاں ہن جِنھاں کوں تیز دھار آلے نال بے رحمی نال قتل کیتا ڳیا ہئی جݙاں جو ملزم بھتریجا عمیر موجود نہ ہئی۔ ملزم عمیر مبینہ طور تے جائیداد دے جھیڑے دی رنجش تے ایں دی اماں، ذال تے ݙو نِکے ٻالاں کوں قتل کیتا تے ٻھج ڳئے۔ واقعے دی اطلاع ملݨ تے ڈسٹرکٹ پولیس آفیسر عرفان سموں واقعے دا سخت نوٹس گھندیں ہوئیں ملزم دی فوری گرفتاری دے احکامات جاری کیتے جݙاں جو پولیس دی بھاری نفری موقع تے پُڄ تے فرانزک ٹیم دے نال مقتولین دیاں لاشاں قبضے اچ گھن تے پوسٹ مارٹم کیتے ہسپتال پڄاوݨ دے بعد ملزم دی ڳول شروع کر ݙتی اے۔
