اسلام آباد۔ 11 مئی (اے پی پی) وزیر دفاع خواجہ محمد آصف بھارت دی جارحیت دا منہ بھن جواب ݙیوݨ تے پوری قوم کوں مبارخ ݙتی ۔ اتوار کوں آپݨے ہک انٹرویو اچ وزیر دفاع آکھیا جو پاکستان دے سخت ردعمل نال بھارت اچ مایوسی اے اتے اُنھاں دا متکبرانہ انداز عاجزی اچ بدل ڳئے جیہڑا دھوڑ چَٹݨ دے سوا کُجھ نئیں۔ خواجہ محمد آصف آکھیا جو پاکستان دے سخت ردعمل دی روشنی اچ بھارت دے پالیسی ساز آپݨیاں پالیسیاں دا ولا جائزہ گھنݨ تے مجبور تھی ڳئن۔ ممکنہ مذاکرات دے سوال تے اُنھاں آکھیا جو پاکستان سندھ طاس معاہدہ، مسئلہ کشمیر تے دہشت گردی دے ترائے اہم خدشیاں کوں ترجیح ݙیسی جِنھاں کوں حل کرݨ تے خطے اچ امن کوں یقینی بݨاوݨ دی لوڑھ اے۔ اے مسئلے پاکستان تے بھارت وچال پراݨے تنازعے ہن تے اِنھاں کوں حل کرݨ کیتے اہم سفارتی کوششاں دی لوڑھ ہوسی۔ اُنھاں آکھیا جو اِنھاں معاملات تے پاکستان دا موقف نشابر اے اتے کہیں وی بامعنی ڳالھ مہاڑ اچ اِنھاں بنیادی خدشیاں کوں دور کرݨ دی لوڑھ ہوسی۔ ہک ٻئے سوال تے خواجہ آصف ریمارکس ݙتے جو بھارت دا غرور خاک اچ مل ڳئے۔ اُنھاں پاکستان دے تحمل کوں کمزوری سمجھݨ دی غلطی کیتی ہئی پر ساݙیاں مسلح افواج فیصلہ کن جواب ݙتے۔ خواجہ محمد آصف پاکستان دیاں مسلح افواج دیاں صلاحیتاں دی تعریف کریندے ہوئیں آکھیا جو ساݙیاں بہادر افواج دیاں صلاحیتاں عالمی سطح تے تسلیم شدہ تے قابل تعریف ہن۔ وزیر اعظم شہباز شریف دا صدر ٹرمپ دی قیادت، عالمی امن کیتے وابستگی تے جنوبی ایشیا اچ دیرپا امن کیتے اہم کردار تے شکریہ ادا کیتا۔
