راولپنڈی۔12مئی(اے پی پی) پاکستان دی مسلح افواج دے ترجمان لیفٹیننٹ جنرل احمد شریف چوہدری آکھیے بھارتی جارحیت تے پاکستان دی مسلح افواج دے شروع کیتے ڳئے آپریشن بُنْیَانٌ مَّرْصُوْص وچ فتح تے اللہ تعالیٰ دا شکر ادا کریندوں ۔ پاکستان کائناں ، بھارت جنگ بندی دی خواہش کیتی ہئی، پاکستانی افواج کنے ایجھے ٻہوں جدید جنگی صلاحیتاں موجود ھن، جنھاں وچوں کجھ دا استعمال محدود سطح تے کیتا ڳئے، ٻہوں ساریاں صلاحیتاں آؤݨ آلے ویلھے کیتے محفوظ رکھیاں ڳئن، کہیں کوں وی کوئی شک نی ہووݨا چاہیدا جو جݙاں کݙاھیں ساݙی خود مختاری یا سرحداں دی خلاف ورزی کیتی ڳئی تاں ساݙا رد عمل جامع اتے فیصلہ کن ہوسی، ایں جھیڑے ہک واری ول مسئلہ کشمیر کوں فلیش پوائنٹ بݨا ݙتے جیہڑا کشمیری عوام دیاں امنگاں موجب حل تھیوݨا چاہیدے ، مسلح افواج پاکستان دے خلاف استعمال تھیوݨ آلے بھارت دے 26 اہم ملٹری ٹارگٹس کوں نشانہ بݨائے، دشمن جتنا موت توں ݙردن ایندے توں ودھ ساݙے جوان شہادت نال پیار کریندن، پاک فضائیہ بوجھ اتے آدم پور دے ایس 400 ایئر ڈیفنس سسٹم، اڑی وچ فیلڈ سپلائی ڈپو، پونچھ وچ ریڈار سسٹم جیھے لاجسٹک اتے سپورٹ مراکز کوں وی نشانہ بݨائے، کے جی ٹاپ، نشہرہ وچ موجود 10 بریگیڈ اتے 80 بریگیڈ دی کمانڈ تنصیبات کوں وی تباہ کیتا ڳئے، اے او تنصیبات ہن جتھوں بلااشتعال فائرنگ کرتے نشوم شہریاں کوں نشانہ بݨایا ڳیا، ساݙی تحویل وچ کوئی وی بھارتی پائلٹ کائنی، اے کوڑی خبر اے ۔ پاک فضائیہ اتے پاک بحریہ دے سینئر افسراں دے نال آئی ایس پی آر وچ قومی اتے بین الاقوامی میڈیا کوں بریفنگ ݙیندے پئے ھن۔ ڈی جی آئی ایس پی آر لیفٹیننٹ جنرل احمد شریف چوہدری آکھیے جو 6 اتے 7 مئی کوں بھارتی جارحیت دے نتیجے وچ تریمتاں اتے ٻالاں سودھے درجناں شہادتاں تھئن، ساݙیاں دلوں ہمدردیاں شہداء دے گھرآلیں نال ہن ، وطن دے دفاع وچ اپݨی جان دا نذرانہ پیش کرݨ آلے شہداء کوں خراج عقیدت پیش کریندوں ۔ انہاں آکھیے جو بھارتی جارحیت دے نتیجے وچ آپریشن بُنْیَانٌ مَّرْصُوْص شروع کیتا ڳیا اتے پاکستان دی مسلح افواج قوم نال کیتا ہویا وعدہ پورا کیتے جیندے تے اساں اللہ تعالیٰ دے شکر گزار ہیسے۔ پاکستانی افواج اپݨی غیور اتے بہادر قوم دا شکریہ ادا کریندی اے جݙاں جو مسلح افواج دے ہر افسر، سپاہی، ایئرمین اتے سیلر دے ٻہوں مشکور ہیسے جنھاں اپݨی جرات، پیشہ ورانہ مہارت اتے قربانی نال میدان جنگ وچ کامیابی کوں ممکن بݨائے۔ انہاں آکھیے جو پاکستان دی مسلح افواج، پوری قوم خصوصاً نینگراں دے جذبے، حوصلے اتے بھرپور حمایت تے دلوں شکر گزار ہیسے، جنھاں اوکھے ویلھے ساݙے حوصلے کوں ودھائے، پاکستان دے انہاں نینگراں دے وی مقروض ہیسے جیہڑے سائبر اتے انفارمیشن دے محاذ تے صف اول دے سپاہی بݨیے، پاکستان دے متحرک اتے بہادر میڈیا دے وی شکر گزار ہیسے جنھاں بھارت دے پروپیگنڈا اتے جنگی جنون دے خلاف آپریشن بُنْیَانٌ مَّرْصُوْص یعنی آہنی دیوار وانڳوں کھڑے تھئے۔ ڈی جی آئی ایس پی آر آکھیے جو اساں بلا تفریق ساریاں سیاسی جماعتاں دی قیادت دے وی ممنون ہیسے جنھاں سیاسی اختلافات توں بالاتر تھی تے وطن دے دفاع وچ ھک مٹھ تھی تے افواج پاکستان دے رلے کھڑے تھیوݨ دا بہترین مظاہرہ کیتے، مسلح افواج بالخصوص پاکستان دے وزیراعظم اتے انہاں دی کابینہ دی قائدانہ صلاحیتاں اتے جرات مندانہ فیصلیں دے وی قدردان ہیسے، جنھاں ملک کوں ایں نازک موڑ تے صحیح پاسے رہنمائی ݙتی ۔ انہاں قوم کوں آپریشن بُنْیَانٌ مَّرْصُوْص دی تفصیلات دا ݙسیندے آکھیے جو مسلح افواج دشمن کوں منہ بھن جواب ݙتے جیندے وچ ترائی افواج دی مکمل ہم آہنگی دے نال صحیح ویلھے تے صورتحال دی آگاہی، نیٹ ورک سینٹرک وار فیئر اتے ملٹی ڈومین آپریشنز دی مکمل صلاحیت بروئے کار گھن آئی ڳئی۔ زمین، فضا، سمندر اتے سائبر اسپیس وچ مکمل ہم آہنگی نال اہم اہداف کوں تباہ کیتا ڳئے اتے پاکستان دے خلاف استعمال تھیوݨ آلے بھارت دے 26 اہم ملٹری ٹارگٹس کوں نشانہ بݨایا ڳئے، او تنصیبات جیڑھیاں پاکستان وچ دہشت گردی کوں ودھاوݨ وچ استعمال تھیندیاں ہن۔ انہاں آکھیے جو نشانہ بݨاوݨ آلیاں جہیں وچ سورت گڑھ، سرسہ، بوجھ، آدم پور، اونتی پورہ، اودھم پور، نالیہ، برنالا، بٹھنڈہ، الواڑا، سری نگر، جموں، مامون، امبالا اتے پٹھان کورٹ شامل ہن، بیاس اتے نگروٹا وچ موجود براہموس میزائل دے ذخیرے جیڑھے پاکستانی شہریاں تے حملیں وچ استعمال تھئے انہاں کوں تباہ کیتا ڳئے۔ ڈی جی آئی ایس پی آر دا آکھݨ ھا جو بھارت دے ایس 400 ایئر ڈیفنس سسٹم کوں پاک فضائیہ بوجھ اتے آدم پور دیاں جہیں تے نشانہ بݨائے جݙاں جو اڑی وچ فیلڈ سپلائی ڈپو اتے پونچھ وچ ریڈار سسٹم جیھے لاجسٹک اتے سپورٹ مراکز کوں وی نشانہ بݨایا ڳئے، کے جی ٹاپ، نشہرہ وچ موجود 10 بریگیڈ اتے 80 بریگیڈ دی کمانڈ تنصیبات کوں وی تباہ کیتا ڳئے، اے اوتنصیبات ھن جتھوں بلااشتعال فائرنگ کرتے نشوم شہریاں کوں نشانہ بݨایا ڳئے۔ انہاں آکھیے جو راجوڑی اتے نوشہرہ وچ موجود ملٹری انٹیلی جنس دی یونٹس اتے انہاں دے فیلڈ عناصر جیہڑے پاکستان وچ دہشت گردی وچ ملوث پراکسیز کوں سپورٹ ݙیندے ہن انہاں کوں وی ختم کیتا ڳئے جݙاں جو لائن آف کنٹرول دے ٻاہر او ساری آرٹلری، لاجیسٹک اتے پوسٹاں جیہڑیاں آزاد کشمیر وچ شہریاں تے فائرنگ کریندیاں ہن انہاں تے شدید اتے مسلسل جوابی کارروائی کیتی ڳئی، اتھاں تئیں جو انہاں چٹے جھنڈے لہرا ݙتے۔ انہاں دا آکھݨ ھا جو بھارت ڈرونز دے ذریعے پاکستان دی فضائی حدود دی خلاف ورزی کیتی تاں جو عوام وچ ݙر کھنڈایا ونڄے اتے انہاں کوں ݙرایا ونڄے، ایندے رد عمل وچ آپریشن بُنْیَانٌ مَّرْصُوْص دے دوران پاکستان دے مسلح ڈرون بھارت دے دارالحکومت نئی دلی سودھے وݙے شہراں اتے مقبوضہ کشمیر توں گھن تے گجرات تئیں مسلسل پرواز کریندے رہین تاں جو پاکستان دی صلاحیت دا نہ صرف اظہار کیتا ونڄے بلکہ اے ݙسایا ونڄے جو ایں ڈرون دے ڈومینز دا موجودہ وار فیئر وچ کوئی فیدہ کائنی ۔ ترجمان مسلح افواج آکھیے جو پاکستانی افواج بھرپور سائبر حملے وی کیتے جیندے نتیجے وچ انہاں بھارتی اہم مواصلاتی اتے انفراسٹرکچر نظام کوں مفلوج کیتا ڳئے جیہڑے بھارتی افواج استعمال کریندی پئی ہئی، انہاں دا آکھݨ ھا جو انہاں اقدامات دے باوجود میں واضح کرݨ چاہنداں جو بھارت دی مسلسل اشتعال انگیزی دے مقابلے وچ پاکستان دا رد عمل نہایت درست، متوازن اتے محدود نوعیت دا رہیا، پاکستان ٻہوں مخصوص اہداف کوں چݨیا تاں جو عام شہری متاثر نہ تھیون۔ انہاں آکھیے جو اساں اے واضح کرݨ چاہندوں جو جݙاں مشرقی سرحد تے افواج پاکستان دفاع وچ مصروف ہن تاں خیبرپختونخوا اتے بلوچستان وچ بھارتی سرپرستی وچ دہشت گردی وچ غیر معمولی ودھارا تھیا، جیہڑا ایں ڳالھ دا ناقابل تردید ثبوت اے جو بھارت پاکستان وچ دہشت گردی کوں اپݨے پراکسیز دے ذریعے ودھیندا پئے۔ ڈی جی آئی ایس پی آر آکھیے جے تساں کوں یاد ہووے تاں مسلح افواج تساں نال 3 چیزاں دا وعدہ کیتا ہئی، اساں تساں کوں ݙسایا ہئی جو اساں بھارتی جارحیت دا منہ بھن جواب ݙیسوں، مگر اے جواب ساݙی مرضی دے ویلھے، جاہ اتے ساݙے طریقہ کار دے مطابق ہوسی۔ اساں قوم کوں آکھیا ہئی جو جݙاں اساں بھارت کوں نشانہ بݨیسوں تاں ساری دنیا کوں پتہ لڳ ویسی، اتے اساں تساں کوں اے وی آکھیا ہئی جو جتنا تہاکوں موت توں ڈر لڳدے ایندے توں ودھ ساݙی مسلح افواج شہادت نال پیار کریندی اے۔ ڈی جی آئی ایس پی آر پاکستانی حملیں دی انٹرنیشنل اتے بھارتی میڈیا تے کوریج دے کلپس ݙکھائے اتے آکھیے جو پوری دنیا ݙٹھے اتے رپورٹ کیتے، اساں ایہو وعدہ کیتا ہئی جیہڑا پورا کیتے۔ انہاں بھارتی وزارت دفاع دے نمائندیں دا ویڈیو کلپ ݙکھائے جیندے وچ او پاکستانی افواج دے حملیں دی تفصیلات بیان کریندے پئے ہن، انہاں آکھیے جو پاکستان صرف بھارتی عسکری اہداف کوں نشانہ بݨائے۔ انہاں دا آکھݨ ھا جو انٹرنیشنل اتے بھارتی میڈیا رپورٹ کریندا پئے جو بھارت وچ صرف عسکری اہداف کوں نشانہ بݨایا ڳئے، اساں تساں کوں آکھیا ہئی جو اساں عام شہریاں کوں نشانہ نی بݨیندے، ساݙا مذہب، ساݙی ثقافت اتے ساݙی مسلح افواج دا پروفیشنل ازم ایں ڳالھ دی اجازت نی ݙیندا جو شہریاں کوں نشانہ بݨایا ونڄے۔ ترجمان پاک فوج آکھیے جو ول تساں ݙٹھا جو کئیں پچھی تے ہٹݨ دی ڳالھ کیتی۔ ڈی جی آئی ایس پی آر ہک سوال دے جواب وچ آکھیے جو میں واضح طور تے آکھݨ چاہنداں جو ساݙی تحویل وچ کوئی وی بھارتی پائلٹ کائںی، اے سوشل میڈیا تے چلݨ آلیاں ڳالھیں اتے مختلف ذرائع توں آوݨ آلیاں کوڑیاں خبراں یا پروپیگنڈا اے۔ انہاں آکھیے جو پاکستان کݙاہیں وی سیز فائر دی کوئی درخواست نی کیتی، حقیقت اے ہے جو 6 اتے 7 مئی دی رات بھارت دی طرفوں درخواست کیتی ڳئی ہئی تاں جو پاکستان واضح جواب ݙتا جو اساں صرف اوں صورت ڳالھ مہاڑ تے آسوں جݙاں اساں اپݨا جواب ݙے ݙیسوں، 10 مئی کوں ساݙا جواب تاریخی ہئی جیندے وچ کہیں شہری آبادی کوں نشانہ نی بݨایا ڳیا، ساݙی جوابی کارروائی دے بعد ہندوستان جنگ بندی دی درخواست کیتی۔ ہک سوال دے جواب وچ انہاں آکھیے جو ایں جھیڑے ہک واری ول مسئلہ کشمیر کوں فلیش پوائنٹ بݨا ݙتے جیڑھا کشمیری عوام دیاں امنگاں دے موجب حل تھیوݨا چاہیدے ۔ ہک ٻئے سوال دے جواب وچ ڈی جی آئی ایس پی آر آکھیے جو حقیقت اے ہےِ جو پاکستان اتے بھارت جیھے 2 ایٹمی طاقتاں دے درمیان جنگ دی کوئی گنجائش کائںی کیوں جو اے ݙوہیں سانڳے تباہی دے مترادف اے، ایں سانڳے پاکستان ایں جیڑھے وچ ٻہوں ذمے واری دا مظاہرہ کیتے ، اتے ایں ڳالھ کوں وی یقینی بݨائے جو مغربی سرحد تے تعینات افواج، جیہڑیاں دہشت گردی نال لڑدیاں پئن انہاں تے اثر نہ پووے۔ جنگ بندی دے حوالے نال سوال دے جواب وچ لیفٹیننٹ جنرل احمد شریف چوہدری دا آکھیے جو پاکستان دی مسلح افواج ایل او سی تے جنگ بندی دی پاسداری کریندی پئی اے، ساݙی افواج دی طرفوں جنگ بندی دی کوئی خلاف ورزی نی کیتی ویندی پئی، کیوں جو اساں ہک پیشہ ور فوج ہیسے اتے اپݨے معاہدیں دی سختی نال پاسداری کریندوں۔ انہاں آکھیے جو پاکستان وچ تاں عوام امن تھیوݨ تے تے خوشیاں منیندے پئن ، لیکن جے کوئی جارحیت تھیندی اے تاں اساں ایندا جواب ضرور ݙیسوں۔ وائس ایڈمرل رب نواز آپریشن بُنْیَانٌ مَّرْصُوْص دے حصے دے طور تے نیوی آپریشنز دی تفصیلات بیان کریندے آکھیے جو اللہ رب العزت دے فضل و کرم نال اساں اپݨے سمندری محاذ تے اپݨے وطن دا دفاع کرݨ اتے دشمن کوں پرے رکھݨ وچ کامیاب رہیوں جیڑھا اعداد و شمار وچ اساں توں ودھ ہئی۔ انہاں آکھیے جو اساں ہمیشہ تیار رہندوں ، اتے ساݙے کیتے امن توں جنگ دی پوزیشن وچ آوݨ کوئی وی اہم ڳالھ کائںی، مقبوضہ کشمیر وچ فالس فلیگ آپریشن دے فوراً بعد ساݙی بحریہ کجھ گھنٹے وچ حالت جنگ وچ آچکی ہئی اتے اساں سمندری محاذ تے کہیں وی جارحیت دا بھرپور جواب ݙیوݨ کیتے بالکل تیارہیسے ۔ انہاں آکھیے جو اساں سمندر وچ تھیوݨ آلیاں ساریاں سرگرمیاں تے پوری نگاہ رکھی ہوئی ہئی، اساں بھارتی ایئرکرافٹ کیریئر آئی این ایس وکرانت تے وی مسلسل نگاہ رکھی ہوئی ہئی اتے پاک فضائیہ دے نال مستقل رابطے وچ ہیسے۔ انہاں آکھیے جو سمندر دے نال نال اساں فضا وچ وی بھارتی سرگرمیاں تے پوری نگاہ رکھی ہوئی ہئی، اساں اپݨے ساحل اتے اپݨے بندرگاہواں دی حفاظت کیتے وی پوری طرح تکڑے ہیسے اتے پاک نیوی سمندری تجارت کوں یقینی بݨائے، ساݙیاں بندرگواں ایں ساری صورتحال وچ کھلیاں اتے فعال رہین۔ ڈپٹی چیف آف ایئر آپریشنز وائس ایئرمارشل اورنگزیب احمد آپریشن بُنْیَانٌ مَّرْصُوْص دی تفصیلات بیان کریندے آکھیے جو بھارت دی طرفوں آوݨ آلے سارے ڈرونز اتے ایس یو ویز دی پہلے ہی نشاندہی کرڳھدی ڳئی ہئی اتے انہاں کوں ناکارہ بݨا ݙتا ڳیا یا تباہ کر ݙتا ڳیا، پاک فضائیہ اہم بھارتی تنصیبات تباہ کیتن اتے جارحیت تے حملہ آور طیارے مار ڈھائے ۔ انہاں آکھیے جو پاک فضائیہ کوں بھارت تے 0-6 توں کامیابی ملی، بھارت براہموس میزائلاں نال وی حملہ کیتا مگر اساں تکنیکی طور تے انہاں کوں ناکارہ بݨائے اتے اپݨے اہداف توں انہاں دا رخ بدل ڳیا ۔ انہاں آکھیے جو بھارت اپݨے میزائلاں دے ذریعے نہ صرف افغانستان بلکہ اپݨے ہی علاقے امرتسر کوں وی نشانہ بݨائے۔ ایئروائس مارشل اورنگزیب احمد آکھیے جو اساں فضا وچ رافیل طیاریں کوں خاص اہمیت ݙیندے پئے ہاسے اتے ایندے بعد زمین تے ایس 400 سسٹم تے ساݙی خاص توجہ ہئی اتے ایں سسٹم کوں آدم پور وچ احتیاط نال نشانہ بݨایا ڳئے
