اسلام آباد۔ 12 مئی (اے پی پی) وفاقی وزیر برائے قومی صحت سدر مصطفیٰ کمال آکھیا اے جو بھارت بزدل دشمن اے، بھارت کوں ایہہ گمان ہئی جو پاکستان اندرونی انتشار دا شکار اے، جݙاں او جارحیت کریسی تاں پاکستان دے اندر لڑائی شروع تھی ویسی، خدا دا شکر اے پوری قوم سارے اختلاف کوں پرے رکھ تے ہک مضبوط کندھ وانگوں پاکستان دی فوج دے نال کھڑی تھی گئی اے۔ اے ڳالھیں انہاں ڈسٹرکٹ ہیڈ کوارٹر ہسپتال کوٹلی دے ٻاہر میڈیا نال ڳالھ مہاڑ کریندے ہوئیں آکھی۔ انہاں آکھیا جو اڄ توں 20 ݙینھ پہلے دا پاکستان اڄ دے پاکستان توں مختلف اے، پوری قوم ریاست اتے افواج پاکستان دے نال کھڑی اے، خدا پاک اساں کوں کامیابی ݙتی اے اتے دشمن دا منہ کالا کیتے، پوری دنیا ساݙی کامیابی کوں منیندی پئی اے جو پاکستان دی مسلح افواج بھارت دا غرور خاک وچ ملا ݙتے۔ انہاں آکھیا جو بھارتی فوج اتے معیشت پاکستان توں 8 گنا وݙی اے، پاکستان بھارت دا ایہہ غرور خاک وچ ملا تے ثابت کیتے جو ساݙا دفاع ناقابل تسخیر اے۔ انہاں آکھیا جو پاکستان دی بری، فضائیہ اتے بحریہ قوم دی مدد اتے دعاواں نال جت توں ملی اے، اساں کوں ایں اتحاد کوں برقرار رکھݨ دی لوڑھ اے۔ انہاں آکھیا جو ڈسٹرکٹ ہیڈ کوارٹر ہسپتال وچ بھارت دی شیلنگ توں ٻالڑی ہک زخمی موجود اے، اوندھا ہک بھرا شہید تھی ڳئے۔ انہاں آکھیا جو بھارت دا مکروہ چہرہ دنیا ݙیکھ گھدے جئیں ٻالاں، تریمتیں اتے گھر ٻیٹھے بزرگاں تے حملے کیتے۔
