اسلام آباد۔12 مئی(اے پی پی) بلوچستان دی پہلی ہندو سرائیکی چھوہیر نوشکی دی اسسٹنٹ کمشنر بݨ ڳئی۔ اسسٹنٹ کمشنر کشش چوہدری آکھیے ڄیکر میں ہک چھوٹے، پسماندہ علاقے توں محنت کر تے کامیاب تھی سڳدی ہاں تاں کوئی وی کامیاب تھی سڳدے۔ اے ڳالھ وزیر اعلیٰ بلوچستان میر سرفراز بگٹی نال بلوچستان پبلک سروس کمیشن دا امتحان امتیازی نمبریں نال پاس کرݨ آلی کم عمر اتے باصلاحیت اقلیتی افسر اسسٹنٹ کمشنر کشش چوہدری اپݨے والد گردھاری لال دے کٹھے ملݨ ویلھے آکھی۔ کشش چوہدری دا تعلق بلوچستان دے پسماندہ اتے دور افتادہ ضلع نوشکی توں اے۔ وزیر اعلیٰ نوجوان خاتون افسر دی شاندار کامیابی تے خوشی اتے ماݨ کریندے آکھیا جو اے کامیابی نہ صرف اقلیتی برادری ٻھل پورے بلوچستان کیتے اعزاز دی ڳالھ اے، ڄیکر نوجواناں کوں موقعے اتے رہنمائی ݙتی ونڄے تاں او کہیں وی میدان اچ کامیابی حاصل کر سڳدن، کشش چوہدری اپݨی محنت، لگن اتے استقامت نال نہ صرف اپݨیاں صلاحیتاں منوائن ٻھل اقلیتی برادری دے ٻئے نوجواناں کوں وی ہک نویں راہ ݙکھائی اے۔ وزیر اعلیٰ بلوچستان ایں کامیابی تے کشش چوہدری کوں سرٹیفکیٹ وی ݙتا۔ ایں موقع تے رکن قومی اسمبلی میر محمد عثمان بادینی، میر غلام دستگیر بادینی، پارلیمانی سیکرٹری برائے اقلیتی امور سنجے کمار اتے اقلیتی رکن صوبائی اسمبلی روی کمار وی موجود ہن۔ (ڈاکٹر سعدیہ کمال)
