اسلام آباد۔12 مئی (اے پی پی)وفاقی وزیر خزانہ و محصولات سینیٹر محمد اورنگزیب آکھیے جو پاکستان ہݨ برآمدات تے مبنی ترقیاتی ماڈل دو ٹر پئے، آئی ٹی خدمات دی برآمدات اچ ودھوتری نال 3.2 ارب ڈالر تئیں پُڄ ڳئین۔ انہاں اے ڳالھ سٹی گروپ گلوبل مارکیٹس دی ہیڈ آف ایمرجنگ مارکیٹس اکانومیز جوہانا چوا اتے سرمایہ کاری برادری دے کئی نمائندیاں نال ورچوئل ملاقات اچ آکھی۔ ملاقات چ وزیر خزانہ انہاں کوں پاکستان دی حالیہ معاشی پیش رفت دا ݙسایا۔ انہاں برطانیہ دے حالیہ دورے اتے ݙوطرفہ شراکت داراں نال تھیوݨ آلیاں ملاقاتاں دا وی ݙسایا اتے فچ ولوں پاکستان دی خودمختار کریڈٹ ریٹنگ اچ بہتری کوں اڳونہا کیتے۔ انہاں آکھیا جو راہ تے قائم رہݨ حکومت دا سنیہا اتے قومی عزم اے، جیہڑا اصلاحات دے تسلسل اتے مالی نظم و ضبط کیتے حکومت دے پختہ ارادے کوں ݙسیندے۔ وزیر خزانہ آئی ایم ایف نال توسیعی فنڈ سہولت دے تحت سٹاف لیول معاہدے دے کامیاب اختتام دا وی ݙسایا اتے آر ایس ایف دی منظوری کوں پاکستان کیتے ہک سنگ میل قرار ݙتا۔ ملاقات اچ جاری ٹیکس اصلاحات تے وی ڳالھ تھئی، جنہاں اچ زرعی آمدن ٹیکس بارے قانون سازی اتے نیشنل ٹیکس کونسل دی بحالی شامل اے۔ جوہانا چوا اتے انہاں دی ٹیم پاکستان اچ حالیہ معاشی بہتری اتے حکومتی اصلاحاتی اقدامات دی تعریف کریندے آئی ایم ایف پروگرام اچ پیش رفت، مالی نظم و ضبط، برآمدات اچ اضافہ اتے ٹیکس اصلاحات دے حوالے نال حکومت دے عزم دا خیرمقدم کیتا۔ مہمان وفد پاکستان نال مسلسل روابط کیتے سٹی گروپ دی دلچسپی اتے ملک دی اصلاحاتی پالیسی اتے عالمی سطح تے ولا روابط کیتے حمایت دا اعادہ کیتا۔ ملاقات دے چھیکڑ تے ݙوہاں پاسوں باہمی روابط جاری رکھݨ اتے مستقبل اچ تعاون دے امکانات ڳولݨ تے اتفاق کیتا ڳیا۔
