راولپنڈی۔12 مئی(اے پی پی)پاک فوج بھارتی جارحیت دے خلاف بھرپور جوابی کارروائی کیتے شروع کیتے ڳئے آپریشن ’’بنیان مرصوص‘‘ دی تکمیل دا اعلان کریندے آکھیے جو پاکستان حملیاں دا بدلہ گھنݨ اتے انصاف ݙیواوݨ دا عزم کیتا ہئی، الحمدللہ، پاکستانی فوج عوام نال کیتا وعدہ توڑ نٻھائے، افواج پاکستان ولوں بھارتی جارحیت دے جواب اچ شروع کیتے ڳئے بھارت دے نال 22 اپریل توں 10 مئی تئیں معرکے کوں ’’معرکہ حق‘‘ دا ناں ݙتا ڳئے۔ آئی ایس پی آر اپݨے اعلامیہ اچ آکھیے جو پاکستان دی مسلح افواج اللہ تعالیٰ دی نعمتاں، رحمت، مدد اتے نصرت تے شکر گزار ہن، اللہ تعالیٰ مومناں تے لازم کیتے جݙاں انہاں تے ظلم تھیوے تاں او ایندا جواب ݙیون، اساں شکر کریندے ہیں جو اللہ تعالیٰ ساکوں میدانِ جنگ اچ کامیابی ݙتی اے، اساں شہداء دے لواحقین اتے خانداناں نال دلی ہمدردی اتے یکجہتی کریندے ہیں جنہاں وطنِ عزیز کیتے اپݨیاں جاناں وارین جݙاں جو زخمی ہم وطناں دی تیکھے صحت یابی کیتے وی دعا گو ہیں۔ آکھیا ڳئے جو اساں پاکستان دی مسلح افواج دے ہر افسر، سپاہی، ایئرمین، اتے سیلر دا وی شکریہ ادا کریندے ہیں جنہاں اپݨی بہادری، پیشہ ورانہ مہارت اتے قربانی نال میدانِ جنگ اچ ایں کامیابی کوں ممکن بݨایا۔ پاکستان دی مسلح افواج پوری پاکستانی قوم دی شکرگزار اے جنہاں دی ناقابلِ تسخیر اخلاقی قوت، عزم، اتے بھرپور حمایت اتے دعاواں ایں اوکھے ویلھے اچ ساݙے نال رہین۔ اعلامیہ اچ پاکستانی میڈیا دا شکریہ ادا کریندے آکھیا ڳئے جو ساݙے میڈیا بھارت دے پروپیگنڈا اتے جنگی جنون دے خلاف آپریشن ’’بنیان مرصوص‘‘ یعنی آہنی کندھ آلی کار کھڑا رہے۔ اعلامیہ اچ آکھیا ڳئے جو اساں سفارتی محاذ تے پاکستان دا مؤقف بین الاقوامی فورمز تے واضح اتے پُراعتماد انداز اچ پیش کرݨ تے پاکستان دے سفارتی عملے دی خدمات کوں وی سرہیندے ہیں۔ ترجمان پاک فوج دے مطابق اساں اپݨے سائنسداناں اتے انجینئرز دے وی شکر گزار ہیں جنہاں مقامی اتے مخصوص نوعیت دیاں ٹیکنالوجیز ٻݨائن، جیہڑیاں آپریشن ’’بنیان مرصوص‘‘ دی شاندار کامیابی اچ بنیادی حیثیت رکھیندن۔ ڈی جی آئی ایس پی آر دا آکھݨ ہئی جو اساں ساریاں سیاسی جماعتاں دی قیادت دے وی ممنون ہیں جنہاں سیاسی اختلافات ہک پاسے ست تے وطن دے دفاع اچ متحد تھی تے افواج پاکستان دے نال کھڑ ݙکھائے، خاص کر وزیراعظم اتے انہاں دی کابینہ دی قائدانہ بصیرت اتے جرأت مندانہ فیصلیاں تے شکر گزار ہیں، جنہاں قوم کوں ایں نازک موڑ تے درست سمت اچ رہنمائی ݙتی۔ بھارتی جارحیت دے خلاف پاکستان دے ردعمل بارے بیان اچ آکھیا ڳئے جو ساݙا جواب تریے افواج دی مشترکہ کارروائیاں دا ہک نمونہ ہئی، جیندے اچ حقیقی ویلے اچ صورتِ حال توں آگاہی، نیٹ ورک سینٹرک وار فیئر اتے ملٹی ڈومین آپریشنز دا بے مثال امتزاج شامل ہئی۔ اعلامیہ دے مطابق زمین، فضا، سمندر اتے سائبر محاذ تے ہم آہنگی نال کارروائیاں کیتیاں ڳئیاں اتے پاکستان دے خلاف استعمال تھیوݨ آلے بھارت دے 26 اہم ملٹری ٹارگٹس کوں نشانہ بݨایا ڳیا، او تنصیبات جیہڑیاں پاکستان اچ دہشت گردی کوں ودھارا ݙیوݨ اچ استعمال تھیندیاں ہن، انہاں تنصیبات کوں نہ صرف مقبوضہ کشمیر اچ ٻھل بھارت اچ وی نشانہ بݨایا ڳیا۔ اے کارروائیاں پاکستان آرمی دے لمبے فاصلے تئیں مار کرݨ آلے ’’فتح‘‘ سیریز ایف ون اتے ایف ٹو میزائلاں، پاک فضائیہ دے درست نشانہ لاوݨ آلے ہتھیاراں، انتہائی مؤثر ’لوئٹرنگ کِلر‘ میزائلاں، اتے لمبے فاصلے تئیں مار کرݨ آلی آرٹلری نال کیتیاں ڳئیاں۔ نشانہ بݨائے ڳئے اہداف اچ بھارتی فضائیہ اتے ایوی ایشن دے اڈے شامل ہن جنہاں اچ سورت گڑھ، سرسا، بھُج، نلیا، آدم پور، بھٹنڈہ، برنالہ، حلوارہ، اونتی پورہ، سری نگر، جموں، ادھم پور، مموں، امبالہ، اتے پٹھان کوٹ شامل ہن اتے انہاں سارے اہداف تے دشمن کوں شدید نقصان تھیا۔ بیاس اتے ناگرُوٹا اچ واقع ’براہموس‘ میزائل دے ذخائر وی تباہ کیتے ڳئے، جیہڑے پاکستانی شہریاں تے حملیاں اچ استعمال تھئے ہن جݙاں جو آدم پور اتے بھُج اچ نصب ایس 400 دفاعی نظام کوں وی پاک فضائیہ کامیابی نال نشانہ بݨائے اتے غیر مؤثر کر ݙتے۔ آئی ایس پی آر آکھیے جو اوڑی اچ فیلڈ سپلائی ڈپو اتے پونجھ اچ ریڈار سسٹم جیہڑے لاجسٹک اتے سپورٹ مراکز ہن، کوں وی نشانہ بݨایا ڳئے جتھوں معصوم پاکستانی شہریاں دے خلاف غیر قانونی بھارتی کارروائی کوں سپورٹ فراہم کیتی ڳئی ہئی۔ ایندے علاوہ کے جی ٹاپ، نوشہرہ اچ موجود 10 بریگیڈ اتے 80 بریگیڈ دی کمانڈ تنصیبات کوں وی مکمل طور تے تباہ کیتا ڳئے، اے او تنصیبات ہن جتھوں بلااشتعال فائرنگ کر تے معصوم شہریاں کوں نشانہ بݨایا ویندا ہئی۔ اعلامیہ اچ آکھیا ڳئے جو ایہو جھیں مراکز جتھاں بھارت اپݨے پراکسی عناصر کوں پناہ ݙتی، تربیت ݙتی اتے انہاں دی صلاحیت اچ ودھارا کیتا، جنہاں پاکستان دے اندرو دہشت گرد حملے کیتے اتے معصوم شہریاں کوں شہید کیتا، انہاں مقامات دی نشاندہی کر تے انہاں کوں وی تباہ کیتا ڳئے جنہاں اچ راجوڑی اتے نوشہرہ اچ موجود بھارتی انٹیلی جنس یونٹس اتے انہاں دے فیلڈ عناصر شامل ہن۔ ایں توں علاوہ لائن آف کنٹرول دے ٻاہرو اوہ ساریاں آرٹلری، لاجسٹک اتے پوسٹاں جیہڑیاں آزاد کشمیر اچ شہریاں تے فائرنگ کریندیاں ہن انہاں تے شدید اتے مسلسل جوابی کارروائی کیتی ڳئی، اخیر انہاں ہتھ کھڑے کر تے چٹے جھنڈے لہرا ݙتے۔ ترجمان پاک فوج دے مطابق بھارت ڈرونز نال پاکستان دی فضائی حدود دی خلاف ورزی کیتی تاں جو عوام اچ خوف پھیلایا ونڄ سڳے اتے انہاں کوں ڈرایا ونڄ سڳے، ٻھل آپریشن ’’بنیان مرصوص‘‘ اچ پاکستان دے مسلح ڈرون بھارت دے دارالحکومت نویں دلی سودھا وݙے شہراں اتے مقبوضہ کشمیر توں گھن تے گجرات تئیں مسلسل پرواز کریندے رہے تاں جو پاکستان دی صلاحیت نا صرف ݙسائی ونڄے اتے اے وی واڄح کریڄے جو ایں محاذ تے بھارتی حکمت عملی ناکام اے۔ اعلامیہ اچ آکھیا ڳئے جو پاکستان دی مسلح افواج مؤثر اتے جامع سائبر آپریشنز وی کیتن جنہاں نال بھارتی افواج دی آپریشنل معاونت فراہم کرݨ والے اہم انفراسٹرکچر اتے سروسز کوں عارضی طور تے مفلوج اتے متاثر کیتا ڳئے۔ پاکستان دی مسلح افواج کولو جدید اتے مخصوص نوعیت دیاں جدید جنگی صلاحیتاں موجود ہن، جنہاں اچوں کجھ دا استعمال محدود سطح تے وݙی احتیاط اتے ذمہ داری نال کیتا ڳئے۔ بیان دے مطابق انہاں سارے اقدامات دے باوجود، بھارتی اشتعال انگیزیاں دے مقابلے اچ پاکستان دا فوجی ردعمل نہایت درست، متناسب ریہا، ایں ردعمل کوں نہایت احتیاط نال ترتیب ݙتا ڳیا تاں جو کہیں شہری کوں نقصان نہ پُڄے اتے صرف انہاں عناصر اتے تنصیبات کوں نشانہ بݨایا ونڄے جیہڑے پاکستانی شہریاں دے بہیمانہ قتل اتے پاکستان اچ دہشت گردی دیاں کارروائیاں اچ براہِ راست ملوث ہن۔ ایں دوران جݙاں مشرقی محاذ تے افواج مصروف ہن، پاکستان کوں خیبرپختونخوا اتے بلوچستان اچ بھارتی سرپرستی اچ دہشت گردی دیاں کارروائیاں اچ غیر معمولی ودھارا برداشت کرݨا پیا، جیہڑا ایں ڳالھ دا مزید ثبوت اے جو بھارت پاکستان اچ دہشت گردی دیاں سازشاں اچ براہِ راست ملوث اے، اتے اوں نے ساݙے آپریشن توں توجہ ہٹاوݨ کیتے اپݨے پراکسی عناصر کوں مکمل طور تے متحرک کر ݙتا ہئی۔ تاہم، پاکستان دی باہمت مسلح افواج مغربی محاذ تے دہشت گردی دے خلاف انتہائی مؤثر کارروائیاں بغیر کہیں وقفے دے آپریشن ’’بنیان مرصوص‘‘ دے نال نال انجام ݙتن۔ آئی ایس پی آر آکھیا جو’’معرکہ حق‘‘ قومی طاقت دے سارے عناصر دے باہم مربوط عمل دی شاندار مثال رہی، جیندے اچ پاکستانی عوام دی بھرپور حمایت ساݙی خودمختاری اتے علاقائی سالمیت دے تحفظ کیتے فیصلہ کن کردار ادا کیتا۔ کہیں کوں ایندے اچ کوئی شک نئیں ہووݨا چاہیدا جو جݙاں وی پاکستان دی خودمختاری کوں خطرہ ہووے یا ایندی سرزمین دی خلاف ورزی کیتی ونڄے، تاں پاکستان دا جوابی ردعمل جامع، فیصلہ کن اتے بھرپور ہوسی۔ پاکستان دی مسلح افواج ایں آزمائش ویلھے پاکستانی قوم دے حوصلے، استقلال اتے جوش و جذبے کوں سلام پیش کریندن اتے انہاں دا شکریہ ادا کریندن۔
