سری نگر۔ 13 مئی (اے پی پی) غیر قانونی طور تے بھارت دے قبضے آلے جموں تے کشمیر وِچ بھارتی فوجیاں آپݨی ریاستی دہشت گردی دی ہِک نویں کارروائی اچ ضلع شوپیاں اِچ تِرائے کشمیری نینگراں کوں ہِک جعلی مُقابلے اِچ شہید کر ݙِتے۔ کشمیر میڈیا سروس موجب، جواناں کوں بھارتی فوجیاں ضلعے دے علاقے کیلر شکرو وِچ گھیرے اَتے تلاشی دی کارروائی اچ شہید کیتا۔ ہِک سینئر بھارتی پولیس افسر جواناں کوں عسکریت پسند قرار ݙیندیں ہوئیں دعویٰ کیتا جو اُنّھاں کوں فائرنگ دے تبادلے وِچ قتل کیتا ڳیا۔ مقامی لوکاں میڈیا نال ڳالھ مُہاڑ کریندیں ہوئیں ݙَسّیا جو بھارتی فورسز جواناں کوں شوپیاں وِچ ہِک جعلی مُقابلے اچ شہید کرݨ دے بعد اُنّھاں دیاں لاشاں کوں علاقے وِچ منتقل کیتِے۔
