اسلام آباد۔ 13 مئی (اے پی پی): وفاقی وزیر اطلاعات ت نشریات عطاء اللہ تارڑ آکھیا جو پاکستان اتے بھارت وچال جنگ بندی مختلف مُلکاں دی موثر سفارتی کوششاں پاروں تھئی اے۔سکائی نیوز کوں ݙتے ڳئے انٹرویو اچ وفاقی وزیر اطلاعات آکھیا جو وزیراعظم پاکستان امریکی صدر ڈونلڈ ٹرمپ دا خصوصی شکریہ ادا کیتے، جنہاں کشیدگی گھٹ کرݨ کیتے اہم کردار ادا کیتا۔ انہاں آکھیا جو چین، سعودی عرب، متحدہ عرب امارات، ترکیہ اتے قطر وی پاکستان اتے بھارت وچال جنگ بندی کیتے اہم سفارتی کردار ادا کیتے۔ ہک سوال دے جواب وچ وفاقی وزیر اطلاعات آکھیا جو امریکی صدر ولوں جاری کیتی ڳئی ݙوجھی ٹویٹ وچ مسئلہ کشمیر دے حل کیتے امریکی خواہش دا واضح اظہار کیتا ڳئے۔ صدر ڈونلڈ ٹرمپ مسئلہ کشمیر دا حل چاہندن۔ ہک ٻئے سوال دے جواب وچ وفاقی وزیر اطلاعات آکھیا جو بھارت پاکستان کوں پاݨی دی فراہمی حالے تئیں بند نئیں کیتی اتے ایں ویلھے پاݨی دی فراہمی معمول دے مطابق جاری اے۔ انہاں دا آکھݨ ہا جو بھارت دے کول پاݨی روکݨ دی تکنیکی صلاحیت کائنی۔ پہلگام واقعے دے سوال وچ وفاقی وزیر اطلاعات آکھیا جو پاکستان ایں افسوسناک واقعے تے ݙکھ اتے ہمدردی دا اظہار کیت اتے شفاف تحقیقات وچ تعاون دی پیشکش کیتی جڈانجو بھارت بغیر کہیں ثبوت دے پاکستان تے الزام لاتے۔ انہاں آکھیا جو ہݨ تئیں بھارت ہک وی ثبوت پیش نئیں کر سڳیا اتے نہ ای کہیں گروہ ایں واقعے دی ذمہ واری قبول کیتی اے۔ عطاء اللہ تارڑ ٻیا آکھیا جو مقبوضہ کشمیر اچ 7 لکھ بھارتی فوج ہووݨ دے باوجود پہلگام سویں واقعے تھیوݨ بھارتی سکیورٹی اتے انٹیلی جنس دی بدترین ناکامی اے اتے بھارت ایں واقعے کوں پاکستان نال جوڑݨ دی کوشش اچ بُری طرح ناکام تھئے۔وفاقی وزیر اطلاعات آکھیا جو جنگ بندی دے بعد پاکستان اتے بھارت دے ڈی جی ایم اوز وچال پہلا رابطہ تھی ڳئے۔ ہک سوال دے جواب وچ وفاقی وزیر اطلاعات آکھیا جو پاکستان دہشت گردی دے خلاف سب توں وݙی جنگ لڑدا پئے اتے مغربی سرحداں تے دہشت گرداں دے خلاف موثر کارروائیاں جاری ہن۔ پاکستان دہشت گردی دے خلاف جنگ وچ بے گناہ شہراں، جواناں اتے افسراں دیاں جاناں دیاں قربانیاں ݙتن۔ انہاں واضح کیتا جو پاکستان وچ کہیں دہشت گرد گروہ دی کوئی محفوظ پناہ گاہ کائنی۔ ہک سوال دے جواب وچ وزیر اطلاعات آکھیا جو اڄوکی جنگ بندی پاکستان دی کمزوری نئیں بلکہ ایندی حکمت عملی اتے سفارت کاری دی کامیابی اے۔ اساں بھارتی فوجی تنصیبات، اسلحہ ڈپو اتے عسکری جہیں کوں نشانہ بݨایا جݙاں جو بھارت دے نقصانات سب دے سامݨے ہن۔ انہاں آکھیا جو بھارت ٻئی کشیدگی برداشت کرݨ دی پوزیشن وچ کائنی۔ انہاں آکھیا جو پوری قوم افواج پاکستان دے نال کھڑی اے، پاکستان دی جت ݙینہہ دی روشنی وانگوں نشابر اے۔
