اسلام آباد۔ 13 مئی (اے پی پی) صدرِ مملکت آصف علی زرداری پاکستان تے بلا اشتعال بھارتی حملیاں اچ شہید تھیوݨ والیاں کوں خراجِ عقیدت پیش کریندیں ہوئیں آکھیا جو مُلخ دی سلامتی کیتے جان دا نذرانہ پیش کرݨ تے پوری قوم پاک فوج اَتے پاک فضائیہ دے بہادر سپوتاں کوں سلام پیش کریندی اِے، مُلخ دی سلامتی اَتے خودمختاری تے تھیوݨ آلے ہر حملے دا مُنہ ٻھن جواب ݙیسُوں۔ منگل کوں ایوانِ صدر دے پریس ونگ توں جاری بیان موجب صدرِ مملکت آکھیا جو اَسّاں کوں آپݨے شہیداں دیاں قربانیاں تے فخر اِے، پاکستانی قوم اَتے مسلح افواج بھارتی جارحیت دے خلاف سیسہ پلائی کندھ وانڳ کھڑی اِے۔ اُنّھاں آکھیا جو اساݙی بہادر فوج قوم اَتے مُلخ دی سالمیت دا کامیابی نال دفاع کیتا، آپریشن ’’بنیان مرصوص‘‘ نال ساݙی بہادر فوج دشمن دا غرور خاک اچ ملا ݙِتا۔ صدرِ مملکت آکھیا جو بھارتی صریح جارحیت پوری پاکستانی قوم کوں ٻہوں ودھ متحد اَتے مضبوط کر ݙِتِے، پاکستانی قوم اَتے اِیندی بہادر افواج کہیں وی جارحیت دا جواب ݙیوݨ کیتے ہر ویلھے تیار ہِن۔ صدرِ مملکت بھارتی حملیاں اچ ٻالاں اَتے تِریمتیں سودھے قیمتی جانی نقصان تے ٻہوں ݙُکھ اَتے افسوس کیتا۔ اُنّھاں فوت تھیوݨ آلیاں دے لواحقین دے نال ہمدردی کیتی اَتے اُنّھاں کیتے صبرِ جمیل دی دُعا کیتی۔ صدرِ مملکت زخمیاں کیتے جلد صحتیابی دی وی دُعا کیتی۔
