افواج پاکستان دے بہادر افسراں اتے جواناں وطنِ عزیز دے دفاع دا وعدہ پورا کر ݙتے، قوم کوں اپݨے شہیداں اتے انہاں دے ٹٻراں تے فخر اے، وزیراعظم شہباز شریف

اسلام آباد۔ 13 مئی (اے پی پی) وزیرِ اعظم محمد شہباز شریف معرکہ حق دے شہداء کوں خراج عقیدت پیش کریندیں ہوئیں آکھیا جو افواج پاکستان دے بہادر افسراں اتے جواناں وطنِ عزیز دے دفاع کیتے قوم نال کیتا ڳیا وعدہ پورا کر ݙتے، پوری قوم کوں آپݨے شہداء اتے انہاں دے ٹبراں تے فخر اے۔ منگل کوں وزیر اعظم آفس دے میڈیا ونگ ولوں جاری بیان موجب وزیر اعظم آکھیا جو آپݨے بہادر سپوتاں دیاں قربانیاں کوں قوم کݙاہیں نہ بھُلسی ۔ وزیر اعظم ارض وطن دے تحفظ وچال پاک فضائیہ دے 5 اتے پاک فوج دے 6 افسراں اتے جواناں دی شہادت تے انہاں کوں خراجِ عقیدت پیش کیتا۔ وزیر اعظم آکھیا جو اساں نہ صرف مُلک دا بھرپور دفاع کیتے بلکہ پاکستان دی سالمیت اتے خودمختاری تے کوئی آنچ نئی آوݨ ݙتی۔ وزیر اعظم آکھیا جو مئیں سودھے پوری قوم کوں آپݨے شہداء اتے انہاں دے ٹبراں تے فخر اے۔ آپݨے بہادر سپوتاں دیاں قربانیاں کوں قوم کݙاہیں نہ بھُلسی۔ وزیرِ اعظم بھارتی جارحیت اچ 15 نینگر ٻالاں اتے 7 تریمتیں سودھے 40 معصوم لوکاں دی شہادت تے ݙکھ اتے افسوس کریندیں ہوئیں آکھیا جو اساں شہدائے وطن کوں نہ وساریے اتے انہاں دے ٹبراں کوں کلہا چھڑیسوں۔ وزیرِ اعظم آکھیا جو شہداء پیکیج دا اعلان تھی ڳئے، شہداء دے ٹبراں دی کفالت دی ذمہ واری ریاست ادا کریسی۔ وزیرِاعظم شہداء دے درجات دی بلندی اتے انہاں دے ٹبراں کیتے صبر جمیل دی دعا کیتی۔ انہاں آکھیا جو آپریشن ’’بنیان مرصوص‘‘ بھارت کوں بھرپور جواب ݙتے ڳئے اتے ایندے تے نشابر کر ݙتا ڳئے جو اینکوں خطے وچ موجود ٻئے مُلکاں دی سالمیت اتے خودمختاری دا احترام کرݨا پوسی۔ معرکہ حق وچ افواج پاکستان بھارت دی عددی برتری دی خوش فہمی اتے غرور کوں مٹی وچ ملا ݙتے۔ وزیرِ اعظم معرکہ حق وچ زخمیاں دی جلدی صحت یابی دی دعا کیتی۔ انہاں آکھیا جو اساں امن پسند قوم ہیسے، مگر کہیں وی جارحیت دا جواب ݙیوݨ ڄاݨدوں اتے آپریشن ’’بنیان مرصوص‘‘ ایندا نشابر ثبوت اے۔