اسلام آباد۔ 13 مئی (اے پی پی) قومی اسمبلی دے اجلاس وِچ منڳل کوں قومی اسمبلی دے ممبراں بھارتی جارحیت دے خلاف افواجِ پاکستان دے مؤثر اتے متحد ردِعمل کوں ٻہوں چنڳّے لوظاں وِچ تعریف کیتی تے بھارتی وزیراعظم نریندر مودی کوں طنزیہ انداز وِچ “سرینڈر مودی” قرار ݙِتا۔ پیپلز پارٹی دی سینئر رہنما حنا ربانی کھر بھارت دے جارحانہ رویے دی مذمت کریندے اینکوں غیر ذمہ دارانہ اتے بین الاقوامی قوانین دے خلاف قرار ݙِتا۔ انھہاں دا آکھݨ ہئی جو بھارت عقل تُوں خالی قدم چاتے، ݙوجھے پاسے پاکستان ذمہ داری دا مظاہرہ کِیتے لیکن ساݙے صبر کوں کمزوری سمجھیا ڳیا۔ اُنّھاں آرٹیکل 370 دے خاتمے تے عالمی برادری دی خاموشی تے افسوس دا اظہار کِیتے اتے آکھیے جو امریکی صدر ڈونلڈ ٹرمپ وی مسئلہ کشمیر کوں متنازعہ منیے ۔ اُنھاں چتاوݨی ݙتی جو دہشت گردی دے خلاف کارروائی دے ناں تے سرحد پار حملیں کوں جواز ݙیوݨ خطرناک مثال بݨسی، جے اِیں دلیل کوں قبول کِیتا ڳیا تاں پاکستان وی بھارت وِچ کارروائیاں دا جواز ݙے سڳدے جِتھاں اساں کنے بھارتی ریاستی دہشت گردی دے ثبوت ہِن۔ پیپلز پارٹی دے رہنما عبدالقادر پٹیل افواجِ پاکستان، چیف آف آرمی سٹاف جنرل سید عاصم منیر اتے پاک فضائیہ کوں جرأت مندانہ اتے متحد ردعمل تے خراجِ تحسین پیش کِیتے۔ انھاں وی مودی کوں “سرینڈر مودی” قرار ݙیندے آکھیے جو پاکستان دُنیا کوں ݙکھا ݙِتے جو اَسّاں امن چاہندوں لیکن جے جنگ ساݙے اُتے مسلط کیتی ڳئی تاں بھرپور جواب ݙیسوں۔ اُنّھاں بھارت تے پاکستان وِچ دہشت گردی دی کارروائیاں وِچ ملوث ہووݨ دا الزام لاتے اتے پاکستان دی جوہری صلاحیت کوں شہید ذوالفقار علی بھٹو اتے شہید بینظیر بھٹو دی کوششاں دا نتیجہ قرار ݙِتا۔ اُنھاں چیئرمین بلاول بھٹو زرداری دی عالمی سطح تے پاکستان دے امن دے پیغام دی ترجمانی دی وی تعریف کیتی ۔ مجلس وحدت المسلمین دے رکن قومی اسمبلی حمید حسین بھارتی حملیں دے خلاف رات دے اندھارے وِچ افواج، سیاسی قیادت، میڈیا اتے عوام دی یکجہتی دی تعریف کیتی۔ تحریکِ انصاف دے رکن اسمبلی فضل محمد خان افواجِ پاکستان دی پیشہ ورانہ مہارت اتے جرأت کوں خراج تحسین پیش کریندے آکھیے جو ساݙی آرمی، نیوی اتے ایئر فورس نہ صرف خطے بلکہ عالمی سطح تے وی اپݨی صلاحیت ثابت کرݙتی اے ۔ جمعیت علمائے اسلام دے رہنما عبدالغفور حیدری افواجِ پاکستان دی تعریف کیتی اتے چین و ترکیہ جیھے دوست مُلکاں دا شکریہ ادا کِیتا جنھاں کشیدہ صورتحال وِچ پاکستان دا ساتھ ݙتا۔ متحدہ قومی موومنٹ (پاکستان) دے رکن اسمبلی سید وسیم حسین قوم دی یکجہتی اتے افواجِ پاکستان دے سخت ردعمل دی تعریف کیتی ۔ پیپلز پارٹی دی سحر کامران حکومت دی خارجہ پالیسی دی تعریف کریندے آکھیے جو اڄوکی کشیدگی دے دوران بھارت کوں سفارتی کلھیپے دا سامݨاں کرݨاں پِئے۔ انہاں آپریشن “بنیان مرصوص” دے دوران قومی اتحاد دی وی تعریف کیتی۔ وفاقی پارلیمانی سیکرٹری گل اصغر خان چین دی حمایت تے شکریہ ادا کِیتا اتے آکھیا جو حکومت بھارت کوں سفارتی سطح تے کلھا کرݙتے ، بھارت عالمی سطح تے کلھا رہ ڳئے ۔ پیپلز پارٹی دے مرزا اختیار بیگ قوم کوں مبارخ ݙیندے افواجِ پاکستان دے ردعمل کوں تاریخی لمحہ قرار ݙِتا۔ اُنھاں آکھیے جو بھارت کوں سفارتی محاذ تے وی شکست تھئی۔ پی پی پی دے ایم این اے مہیش کمار ملانی آکھیے جو افواجِ پاکستان بھارتی ڈرونز اتے طیارے ڈھا تے تے فیصلہ کن ردعمل ݙِتا۔ انہاں آکھیے جو جو پوری قوم بشمول اقلیتاں بھارتی جارحیت دے خلاف افواج دے نال مونڈھے نال مونڈھا رلا تے کھڑی اے۔
