بھارت تے حملے کیتے جوہری ہتھیار لاوݨ دا کوئی منصوبہ کائنا ہا، نائب وزیراعظم سینیٹر محمد اسحاق ڈار دا امریکی نشریاتی ادارہ ”سی این این“ کوں انٹرویو

اسلام آباد۔13 مئی(اے پی پی)نائب وزیراعظم تے وزیر خارجہ سینیٹر محمد اسحاق ڈار آکھیے جو پچھلے ہفتے پاکستان اتے بھارت وچال شدید کشیدگی اچ پاکستان بھارت تے حملہ کرݨ کیتے جوہری ہتھیار نصب کرݨ غور کیتے ن اینڄھا کوئی منصوبہ ہا۔ امریکی نشریاتی ادارہ ”سی این این“ کوں انٹرویو اچ انہاں آکھیا جو 7 مئی کوں بھارت دے سرحد پار حملیاں دے بعد پاکستان کولو اپݨے دفاع اچ حملے کرݨ دے سوا کوئی ٻیا راہ کائنا ہئی۔ انہاں بھارت دے حملیاں کوں جنگ اتے کشمیر اچ اپݨی بالادستی قائم کرݨ دی کوشش قرار ݙیندے آکھیا جو کݙاہیں کݙاہیں اینجھے ویلے آندن جݙاں تہاکوں ٻہوں سنجیدہ فیصلے گھنݨے پوندن، ساکوں پورا یقین ہئی جو ساݙی روایتی صلاحیت تے دفاعی صلاحیتاں اتنیاں مضبوط ہن جو اساں بھارت کوں فضا اتے زمین ݙوہیں ڄاہیں تے شکست ݙیسوں۔ نائب وزیراعظم آکھیا جو جنگ بندی دا معاہدہ ہݨ تئیں برقرار نظر آندا پئے، ٻھل ݙوہیں فریقاں وچال حالی تئیں دور رس مذاکرات نئیں تھئے، ہݨ وی ساکوں امید اے جو احساس غالب رہسی، ہر کہیں دے فیدے اچ اے جو ایجھیں معاملات کوں ہک خاص ویلے توں اڳو نہ چھوڑیا ونجے۔ انہاں آکھیا جو بھارتیاں ݙیکھ ڳھدے جو انہآں دے آسمان تے کیا تھئےَ او اے وی ݙیکھ چکین جو نقصان کتنا سنگین ہئی۔ نائب وزیر اعظم آکھیا جو بھارتی اتے پاکستانی حکام وچال کوئی براہ راست رابطہ کائنا ہئی۔ نائب وزیراعظم تے وزیر خارجہ بھارت دے ڈائریکٹر جنرل ملٹری آپریشنز دے ایں دعوے کوں غلط قرار ݙتا جیندے اچ آکھیا ڳیا ہئی جو انہاں کوں مبینہ طور تے ڳالھ مہاڑ اچ پاکستانی ہم منصب دا سنیہا ملیا ہئی۔ سینیٹر محمد اسحاق ڈار آکھیا جو امریکی وزیر خارجہ مارکو روبیو اے سنیہا ݙتا ہئی جو بھارت لڑائی روکن کیتے تیار اے۔ انہاں آکھیا جو پاکستان طویل مدتی امن اتے سلامتی کیتے اینجھا رستہ ڳولݨ دا تانڳھی اے جیڑھا ”ݙوہیں پاسو کیتے وقار“ قائم کرے۔ نائب وزیراعظم تنازعہ کشمیر کوں علاقائی عدم استحکام دی بنیادی وجہ قرار ݙیندے کشمیری عوام کوں حق خود ارادیت ݙیوݨ تے زور ݙتا۔ انہاں اعادہ کیتا جو پہلگام اچ پچھلے مہینے تھیوݨ آلے حملہ اچ پاکستان دا ہتھ کائناں ہئی اتے اے اساں ہر قسم دی دہشت گردی دی مذمت کریندوں۔ سینیٹر محمد اسحاق ڈار تنازعہ کشمیر دا حل ڳولݨ بارے صدر ڈونلڈ ٹرمپ دی سوشل میڈیا پوسٹ دو اشارہ کریندے آکھیا جو امریکی صدر پاکستان دی انسداد دہشت گردی دیاں کوششاں دی حمایت کیتی، ڄیکر او ساݙیاں کوششاں تے یقین نہ کریندے تاں او ایویں تعاون نہ کریندے جیویں انہاں کیتے۔ نائب وزیراعظم سندھ طاس معاہدے کوں التواء اچ رکھݨ دے بھارتی فیصلے دا حوالہ ݙیندے چتاوݨی ݙتی جو پاݨی دا مسئلہ آوݨ آلے مذاکرات اچ حل نہ کیتا ڳیا تاں پہلے توں ہی غیر یقینی جنگ بندی کوں خطرہ لاحق تھی سڳدے، پاݨی دے مسئلے کوں حل کرݨ اچ ناکامی جنگ دے مترادف ہوسی۔