اسلام آباد۔13 مئی (اے پی پی): پاکستان ویتنام پارلیمانی سنگتی جوڑ گروپ (پی ایف جی) دا پہلا جانکاری کٹھ منگل دے ڈینھ اتھاں ایم این اے تے پارلیمانی سیکرٹری برائے انسانی حقوق صبا صادق دی صدارت ہیٹھ پارلیمنٹ ہائوس وچ تھیا۔ ایں کٹھ وچ ممبران آسیہ ناز تنولی، شہناز سلیم ملک، کرن حیدر، اختر بی بی تے شائستہ خان رَلّے۔ وزارت انسانی حقوق توں جاری پریس رلیز موجب ویتنام وچ پاکستان دے سفیر، تجارت تے سرمایہ کاری دے اتاشی تے وزارت خارجہ تے تجارت دے افسران ڈوطرفہ تعلقات، تجارت، سرمایہ کاری تے مذہبی سیاحت دے حوالے نال جانکاری ݙتی۔ پاکستان ویتنام پارلیمانی سنگتی جوڑ گروپ دی کنوینر صبا صادق پاکستان دے بدھ مت دے ورثے نال جُڑی مذہبی سیاحت کوں ودھارا ݙیوݨ دے حوالے نال رَل تے کم کرݨ دے امکانات تے زور ݙتا۔ انہاں آکھیا جو بین الپارلیمانی رابطیاں کوں مضبوط کرݨ سودھے معاشی تے ثقافتی شعبیاں وچ رَل تے کم کوں ودھاوݨ دی لوڑھ اے۔ اراکین پاکستان تے ویتنام دے درمیان ڈوطرفہ تعلقات کوں ودھاوݨ، سفارتی کوششاں دی حمایت تے عوام نال عوام تے پارلیمانی رَلّت کوں مضبوط بݨاوݨ دے آپݨے پکے ارادے دا ولا اعلان کیتا۔
