اقوام متحدہ۔14مئی (اے پی پی) پاکستان اقوام متحدہ اچ اسرائیل دی غزہ اچ مکمل امدادی ناکہ بندی دے حوالے نال فلسطینیاں دے مصائب مکاوݨ سانڳے وختی کارروائی کرݨ دی اپیل کیتی اے۔ اقوام متحدہ اچ پاکستان دے مستقل مندوب عاصم افتخار احمد اقوام متحدہ دی سلامتی کونسل توں مطالبہ کیتے جو او فلسطینی عوام دے مصائب کوں ختم کرݨ اتے انہاں کوں انصاف ݙیواوݨ اچ جلدی کرے۔ انہاں غزہ اچ انسانی ہمدردی دی صورتحال اتے امدادی کارکنان دے تحفظ بارے بریفنگ اچ آکھیے مقبوضہ فلسطینی علاقے اچ انسانی المیہ تباہ کن حد تئیں پُج ڳئے۔ انہاں آکھیے غزہ اچ شہری آبادی دی منظم تباہی، فاقہ کشی، مسلسل محاصرہ اتے انسانی ہمدردی دے فن تعمیر کوں نشانہ بݨا تے اتے طریقہ کار نال ختم کرݨ حادثاتی کائںی ۔ پاکستانی سفیر نشاندہی کیتی اے جو اسرائیل غزہ اچ اپݨی طاقت دے ذریعے جاݨ ٻُجھ تے جارحیت کریندا پئے جئیں دا نشانہ او لوکاں کوں بݨیندا پئے۔ انہاں آکھیے غزہ اچ 20 لکھ توں ودھ لوک، جیندے اچ ادھ ٻال شامل ہن، ناقابل برداشت حالات دا سامݨا کریندے پئن۔ انہاں آکھیے امداد بند کر ݙتی ڳئی اے، غزہ اچ ہسپتال تباہ تھی ڳئن اتے کئی ٹٻر ملبے اچ پھتے ہوئے زندگی اتے موت دی کشمکش اچ مبتلا ہن۔ انہاں آکھیے قحط ختم نی تھیندا پیا اتے غزہ اچ ݙو سال توں گھٹ عمر دے ہر ترائے اچوں ہک ٻال شدید غذائی قلت دا شکار اے۔ سفیر عاصم افتخار احمد آکھیے ہسپتالاں، امدادی قافلیاں، انسانی ہمدردی دے کارکنان اتے اقوام متحدہ دے عملے تے حملیاں اچ 290 اہلکار اپݨیاں زندگیاں توں ہتھ دھو ٻیٹھن۔ پاکستانی سفیر واضح طور تے نام نہاد ملٹریائزڈ ‘امداد کوآرڈینیشن میکانزم’ کوں مسترد کرݙتا، جیڑھا فوجی تنصیبات دے نیڑے انسانی ہمدردی دی رسائی دی جاہ کوں 400 توں گھٹ کرتے صرف 5 سخت کنٹرول آلے مرکزاں تئیں محدود تھیندے، اے امداد کوآرڈینیشن میکانزم غیر جانبداری دے بنیادی انسانی اصولاں کوں کمزور کریندے اتے انہاں دی خلاف ورزی کریندے اتے جبری طور تے انسانی ہمدردی دی جاہ کوں تبدیل کرݨ دے خطرات لاحق ہن۔ انہاں آکھیے اے مکمل طور تے ناقابل قبول اے۔ اے ڳالھ نوٹ کریندے ہوئیں جو مقبوضہ فلسطینی علاقے دی ہیومینٹیرین کنٹری ٹیم (ایچ سی ٹی) جیڑھی اقوام متحدہ دے تقریباً 15 اداریاں اتے 200 توں ودھ این جی اوز کوں کٹھا کریندی اے، اسرائیلی حکام دے منصوبیاں دی واضح طور تے مذمت کیتی ہئی جو موجودہ فنڈز دی تقسیم دے نظام کوں ختم کر ݙتا ڳئے۔ انہاں آکھیے انسانی ہمدردی دے اصولاں اتے ایویں لڳدے جو زندگی کوں برقرار رکھݨ آلیں تے دباؤ ہک فوجی حکمت عملی دے حصے دے طور تے کنٹرول کوں مضبوط کرݨ کیتے ڈیزائن کیتا ڳئے۔ ایں سلسلے اچ انہاں غزہ اچ مستقل اتے غیر مشروط جنگ بندی تے زور ݙتا، جیندے بارے انہاں آکھیے جو اے صرف امداد دی شرط نی، بلکہ زندگی دی پیشگی شرط اے۔ انہاں آکھیے 2 مارچ توں مسلط کیتی ڳئی ناکہ بندی کوں ہٹایا ونڄݨا چاہیدے، اتے امدادی قافلیں اتے طبی ٹیماں کوں محفوظ اتے آزادانہ اتے محفوظ طریقے نال کم کرݨ دی اجازت ݙتی ونڄݨی چاہیدی اے۔ انہاں آکھیے جنگ دے ہتھیار دے طور تے بُکھ کوں معمول بݨاوݨ ہک جرم اے۔ انہاں آکھیے اے اجتماعی سزا ختم تھیوݨی چاہیدی اے اتے احتساب کوں یقینی بݨایا ونڄݨا چاہیدے۔ انہاں آکھیے فلسطینی پناہ گزیناں کیتے اقوام متحدہ دی ایجنسی (یواین آر ڈبلیو اے) کوں بغیر کہیں رکاوٹ دے کم کرݨ دی اجازت ہووݨی چاہیدی اے۔
